Ерөнхийлөгч асан, МАХН-ын дарга Н.Энхбаярыг Эрүүгийн хуулийн 150.3, 263.2- дахь заалтыг үндэслэн яллагдагчаар татаад буй билээ.  Нийслэлийн Сүхбаатар дүүргийн шүүх түүнд холбогдох хэргийг хэлэлцэж эхэлсэн ч Н.Энхбаярын биеийн байдал муу, олны өмнө гарах боломжгүй гэсэн тайлбараар шүүх хурлыг 6 сарын 4 хүртэл хойшлуулаад байгаа.
Энэ хооронд түүний удирддаг МАХН, МҮАН-ын "Шударга ёс" эвсэл сонгуульд оролцохоо мэдэгдэж, эмнэлэгт байгаа даргынхаа нэрийг намын жагсаалтынхаа 1-т бичиж, СЕХ-д бүртгүүлээд буй.

Тэгвэл Н.Энхбаяр 6 сарын 4-нд болох шүүх хурлыг ч хойшлуулах хүсэлт дүүргийн шүүхэд гаргажээ. Түүний өмгөөлөгч О.Баасанхүүгийн хэлж буйгаар Н.Энхбаяр ба өмгөөлөгчид нь нотлох баримттай одоог хүртэл танилцаж дуусаагүй ба 6 сарын 4-нд ч амжих бололцоо байхгүй гэнэ.
Эх сурвалжуудын хэлж буйгаар Н.Энхбаяр дээрх мэт элдэв арга саам хэрэглэн, шүүх хурлыг хойшлуулсаар сонгууль өнгөрөөж, УИХ-ын гишүүн болох тактик баримталж буй бололтой.
МАХН-ын дарга Н.Энхбаярт холбогдох хэргийг шүүх эцэслэн хэлэлцэж, түүнд ял өгөхөөс бусад тохиолдолд тэрээр УИХ-д өрсөлдөх эрхээ эдэлсээр байх юм.