Хятадын Аюулаас хамгаалах яамны албан хаагч АНУ-ын талд тагнуул хийсэн, улсын нууц задалсан хэрэгт сэжиглэгдэн баривчлагдсан тухай Хонконгийн хэвлэлд мэдээлжээ. Аюулаас хамгаалах яамны орлогч сайдын хувийн нарийн бичгийн даргаар ажиллаж байсан эр энэ оны эхээр баривчлагдсан байна. АНУ-ын Төрийн нарийн бичгийн дарга Хиллари Клинтон баривчилгааны тухай хэвлэлийн мэдээллийн талаар тайлбар өгөхөөс татгалзжээ. Хэрвээ энэ мэдээлэл нотлогдвол сүүлийн хэдэн сарын хугацаанд хоёр орны харилцаанд гарч буй гурав дахь томоохон хэрэг явдал болох юм. Мөн 1985 оноос хойш гарч буй ийм өндөр түвшинд үйлдэгдсэн анхны дуулиант хэрэг болно. Ройтер агентлагийн мэдээлснээр, офицерыг нууц дотно харилцаатай байсан эмэгтэйнх нь хамт авсан гэрэл зургаар дарамталж байгаад Америкийн Тагнуулын төв газар элсүүлсэн байна.
Энэ мэдээлэлд тайлбар өгөхийг хүссэн Ройтер агентлагийн хүсэлтэд Хятадын ГХЯ хариу өгөөгүй ажээ.
Хятад болон Америкийн хооронд гарсан тагнуулын хэргийн ихэнх нь аж үйлдвэрийн тагнуултай холбоотой байдаг. Жишээ нь, өнгөрсөн онд Хавайид энэтхэг гаралтай инженер В-2 бөмбөгдөгч онгоцтой холбоотой цэргийн нууцыг Хятадад худалдсан хэргээ хүлээжээ. 2003 онд Холбооны тагнан мөрдөх товчооны даалгавраар Хятадад тагнуул хийх ёстой байсан америк эмэгтэй тус товчооны тагнуулч байсан нууц амрагийн хамт баривчлагдсан байна. Гэхдээ шүүх түүний хэргийг хэрэгсэхгүй болгожээ.
З.Амгалан 
МОНЦАМЭ