Цөмийн нэлээд хэдэн бөмбөг бүтээхэд хангалттай хүрэлцэхээр бага хэмжээгээр баяжуулсан ураны нөөц Иранд бий гэж Олон улсын атомын энергийн агентлаг /МАГАТЭ/ дахь АНУ-ын төлөөлөгч Роберт Вуд мэдэгджээ.
"Иран үнэхээр бага хэмжээгээр баяжуулдаг ураны хэмжээгээ нэмэгдүүлсэн. Тийм хэмжээний бага баяжуулсан уран нэлээд хэдэн цөмийн бөмбөг бүтээхэд хүрэлцэнэ" гэж Вуд хэлсэн байна.
Энхийн зориулалттай атом хөтөлбөрөөр халхавчлан Иран улс цөмийн зэвсэг боловсруулж байна хэмээн АНУ болон Өрнөдийн бусад орон сэжиглэдэг. Үүнийг Тегеран няцаагаад, цөмийн хөтөлбөр нь улсынх нь эрчим хүчний хэрэгцээг л хангахад зориулагдсан гэж мэдэгддэг билээ.
Хэд хэдэн улс болон байгууллага Ираны талаар янз бүрийн тогтоол гаргаж, цөмийн хөтөлбөрөө бүрэн ил тод болгож, зөвхөн энхийн зориулалттай болохыг нотлохыг шаарддаг байна. Одоо Ираны талаар НҮБ-ын Аюулгүйн зөвлөл дуулиантай дөрвөн тогтоол гаргасан байгаа билээ.
Энэ оны хоёрдугаар сарын дундуур Ираны эрх баригчид Натанзын уран баяжуулах үйлдвэрт шинээр 3000 центрифугийг нэмж ашиглалтад оруулж, нийт 9000 центрифугтай болсон тухайгаа мэдээлсэн юм.
З.Амгалан
МОНЦАМЭ