Дэлхийн сонгодог урлагийн “олимп” гэгддэг суут хөгжмийн зохиолч П.И.Чайковскийн нэрэмжит олон улсын уралдаанаас мөнгөн медаль хүртэж байсан УДБЭТ-ын гоцлол дуучин, гавьяат жүжигчин Э.Амартүвшин БНХАУ-ын нийслэлд, дуурийн алдарт дуучин Пласидо Домингогийн нэрэмжит уралдаанд оролцож буй билээ. Тэрбээр улс бүрийн шилдгүүдтэй өрсөлдөж шилдэг 40-д багтсанаар уг тэмцээнд оролцох эрхээ аваад байсан. Харин тэр дараагийн шатандаа амжилттай дуулж шилдэг 20-д шалгарч чаджээ.

Түүнийг өнөөдөр финалын уралдаан хүлээж байгаа бөгөөд мөн сайн дуулбал шилдэг 10-т үлдэх учиртай юм. Төгсгөлийн шатанд шалгарсан 10 дуучин Пласидо Домингогийн удирдах симфони найрал хөгжимтэй дуулах аж.

Тус тэмцээнийг 1993 оноос эхлэн жил бүр зохион байгуулж ирсэн бөгөөд Швейцарийн алдарт “Rolех” компани ивээн тэтгэдэг.

Франц, Мексик, Испани, Япон, Герман, АНУ, Австри, Болгар, Унгар, Итали, ОХУ зэрэг улсад зохион байгуулж байсан уг тэмцээн энэ жил Хятадад анх удаа болж байгаа юм. Сонирхуулахад, уралдааны тэргүүн байрт хоёр хүнийг шалгаруулж, тус бүр 30, II байрт мөн хоёр хүнийг 20, III байрт хоёр хүн шалгаруулж 10, тусгай байрын таван дуучинг 15 мянган ам.доллараар тус тус шагнаж урамшуулах юм.