УИХ-ын Хэвлэл мэдээлэл, олон нийттэй харилцах хэлтсийн дарга, сэтгүүлч Ш.Содномжамц Монгол Улсын Ерөнхийлөгчийн зарлигаар төрийн дээд шагнал “Алтан гадас” одонгоор энгэрээ мялаалаа.
Ш.Содномжамцын сэтгүүл зүйн салбарт оруулсан хувь нэмэр, сэтгүүлчийн олон жилийн нөр их хөдөлмөр, зүтгэлийг төр ийнхүү үнэлж, Үндэсний их баяр наадмын 91 жилийн ойн босгон дээр шагнасан байна.
Ш.Содномжамц 1984 онд МУИС-ийг сэтгүүлч мэргэжлээр төгссөнөөс хойш төв, орон нутгийн хэвлэл мэдээллийн салбарт ажиллаж, сэтгүүл зүйн бүх төрлөөр бүтээл туурвисны зэрэгцээ олон залуу сэтгүүлчийг сэтгүүлчийн мэргэшилд сургаж, дадлагажуулж ирсэн юм. Түүний гарын шавь болох олон залуу сэтгүүлчид Монголын сэтгүүл зүйн салбарын өнөөгийн дүр төрхийг тодорхойлоход гол үүрэг гүйцэтгэж байгаа билээ.
Тэрээр сэтгүүлч, уран бүтээлчийн хувьд 2010 онд “Монгол тэнгэр” шүлгийн, “Бүтэн дэлхий” тэмдэглэл, нийтлэлийн, 2011 онд “Далд түүхийн ил хуудас” баримтат нийтлэлийн, 2012 онд “Хүмүүн заяа” хөрөг, нийтлэлийн ном хэвлүүлж, “Бүтэн дэлхий” номоороо 2011 онд Монголын сэтгүүлчдийн нэгдсэн эвлэлийн нэрэмжит шагнал хүртсэн байна.
УИХ-ын Хэвлэл мэдээлэл, олон нийттэй харилцах хэлтсийн дарга, сэтгүүлч Ш.Содномжамцыг төрийн өндөр шагналаар шагнуулсан явдалд УИХ-ын Тамгын газрын хамт олон, УИХ-ын Хэвлэл мэдээлэл, олон нийттэй харилцах хэлтсийн хамт олон чин сэтгэлийн баяр хүргэж, цаашдын ажил, амьдралд нь сайн сайхныг хүсэн ерөөж байна.