Улсын бүртгэлийн ерөнхий газраас цахим үнэмлэх олгох ажлыг эрчимжүүлэх зорилгоор  есдүгээр сарын 15-ны бямба гаригт буюу энэ амралтын өдөр “Цахим үнэмлэх” сэдэвт Нээлттэй хаалганы өдрийг аймаг, нийслэлийн хэмжээнд  тус тусын байрандаа зохион явуулах гэж байна.

Өнөөдрийн  байдлаар 18 аймаг, нийслэлийн 4 дүүргийн иргэдийн иргэний цахим үнэмлэх хэвлэх ажил бүрэн дуусаад байна. Тухайлбал: нийслэлийн Баянгол, Баянзүрх, Сонгинохайрхан, Сүхбаатар дүүрэг, орон нутагт Говь-Алтай, Дундговь, Говь-Сүмбэр, Хэнтий, Дорноговь, Дархан-Уул,  Өмнөговь, Ховд, Увс, Дорнод, Төв, Хөвсгөл, Баянхонгор, Булган,  Завхан, Орхон, Сүхбаатар, аймгийн иргэдийн цахим үнэмлэх улсын хэмжээнд 74 орчим хувьтай хэвлэгдэж  сум, дүүрэг,  баг, хороондоо хүргэгдээд байна.

Иймээс дээрх аймаг, нийслэл дүүргийн иргэд есдүгээр сарын 15-ны бямба гарагт зохион байгуулагдах Нээлттэй хаалганы өдөр  оршин суугаа баг, хороон дээрээ очиж цахим үнэмлэхээ авахыг тус газраас уриалж байна .

Иргэд цахим үнэмлэхээ авахдаа өөрийн иргэний үнэмлэхээ авч очно. Харин иргэний үнэмлэхээ хаяж, үрэгдүүлсэн бол иргэний үнэмлэхийн зурагтай лавлагаа, лавлагаа аваагүй иргэд холбогдох бичиг баримтын хамт оршин суугаа баг, хорооноосоо иргэний цахим үнэмлэхээ авна.

Нээлттэй хаалганы өдрөөр Улсын бүртгэлийн ерөнхий газар улсын хэмжээнд  бүрэн бүрэлдэхүүнээрээ ажиллаж иргэдэд цахим үнэмлэх олгохоос гадна бусад ажлын өдрүүдэд үзүүлдэг иргэний гэр бүлийн байдлын 8 төрлийн бүртгэл болон хуулийн этгээд, аж ахуй нэгжийн бүртгэл, эд хөрөнгийн эрхийн бүртгэл,  гадаад паспорт шинээр авах, хугацааны сунгалт хийх , архивын лавлагаа олгох зэрэг бүхий л үйлчилгээг үзүүлнэ.