АНЭУ-ын Дубайд Таж Махалын хуулбарыг барих ажилд нэг тэрбум ам.долларын хөрөнгө зарцуулахаар болжээ. "Таж Арабиа" хэмээх уг цогцолбор барилга нь эх барилгаас хавьгүй том буюу 300 өрөөтэй зочид буудал, дэлгүүрүүд болон бусад худалдаа үйлчилгээний хэсгүүдтэй байх тухай "Arun Mehra" компани мэдээлсэн байна. Барилгын ажил 2014 онд дуусах ажээ.
Цогцолбор барилга дотор Эйфелийн цамхаг, Египетийн Пирамидууд болон Хятадын Цагаан Хэрэмийн багасгасан хувилбарууд мөн байх гэнэ.
Энэтхэгийн хойд хэсгийн Агра хотод байдаг Таж Махал барилга нь ЮНЕСКО-гийн дэлхийн өвд бүртгэгдсэн байдаг билээ. Энэхүү гайхамшигт уран барилгыг 350 гаруй жилийн өмнө  Их Моголын эзэнт гүрний хаан Шах Жахан өөрийн хайрт хатан Мумтаз Махалд зориулан бариулсан түүхтэй. Энэ бунхныг барьж дуусгахад 20 гаруй жил зарцуулагджээ.
"Таж Арабиа" цогцолбор нь дурлалт хосуудын хуримаа хийхээр зорьдог газруудын нэг болно гэдэгт төслийг хэрэгжүүлэгчид найдаж байна.
Э.АМАР