Үндэсний уул уурхайн “Бэрх-Уул” компани Хэнтий аймгийн Батноров сумын Дэлгэрхааны жоншны ордын нөөцийн тайланг албан ёсоор гаргасан тухай “Mining Weekly” сайт мэдээлжээ. Олон улсын N1 43-101 стандартаар баталсан хүдрийн агууламж нь 33.7 хувь бөгөөд энэ нь өндөр зэрэглэлд тооцогддог аж. Нийт 19 сая тоннын баталгаат нөөцтэй энэхүү ордын олон улсын үнэлгээ нь 1.06 тэрбум ам.доллар болж байгаа гэнэ.
Дэлгэрхааны ордод одоогийн байдлаар 1800 тууш метрийн цооногууд гаргасан байгаа юм байна. Түүнчлэн ордыг бүрэн ашиглахын тулд ТЭЗҮ батлах ажлыг эхлүүлжээ. Энэ ажил 2013 оны дундуур дуусах бөгөөд ордын загварчлалыг гаргахын тулд гурван хэмжээст аргачлал ашигласан нь Монголын уул уурхайд шинэ зүйл болсон аж.
Эх сурвалж: "Өглөөний Сонин"
