ОХУ-ын “Зенит” багийн бразил довтлогч Халк хойд хөршөөс явахаар завдаж байж магадгүй болоод байна. Удельное дахь “Зенит” багийн бэлтгэлийн баазын гарах хаалганы орчимд Халкийн зураг бүхий, хуурамч тэсрэх бөмбөг олдсон явдал түүнийг ийн нүүр буруулахад хүргэжээ. Хэдийгээр хөлбөмбөгч энэ мэдээллийг үгүйсгэж байгаа ч үнэндээ ийм зүйл болсон, Халк айж байгаа гэдэг яриа Оросын хөлбөмбөгийн ертөнцөд хуурай өвсөнд ассан түймэр шиг л дэгдэж байна. Бразилийн “Terra” сонины сэтгүүлч түүнээс энэ талаар тайлбар авчээ.

-“Зенит”-ийн бэлтгэлийн баазад таны зурагтай тэсрэх бөмбөгийг дуурайлган хийсэн загвар тавьсан байсан гэдэг үнэн үү?
-Үгүй ээ, тийм юм болоогүй. Хэрвээ энэ үнэн бол би зүгээр л, гэр бүлээ аваад Оросоос шууд явна. Намайг эзгүй үед гэр бүлийг маань аюул отож байна гэж бодохоор аймшигтай. Багийн хувьд надтай ямар ч асуудалгүй, сайхан харилцаж байгаа. Тэгэхээр одоохондоо ямар нэг юм болоогүй гэж хэлье.
-Энэ түүхийг та хэзээ сонсов?
-Баазад ирээд удаагүй байхад Бруну Алвеш хэлсэн. Тэр интернэтэд орж олж мэдсэн юм билээ. Би багийн удирдлагуудтай уулзаж энэ талаар хэлэхэд надад ямар ч аюулгүй, мэдээлэгдэж байгаа шиг юм болоогүй гэж хэлсэн. Мөн энэ хуурамч мэдээллийг тараасан үнийг олно гэж амалсан. Үнэндээ тийм юм болоогүй юм билээ.   

Х.Сайхан

Эх сурвалж: www.mminfo.mn