Манай улсын хүнсний зах зээлд хэдийнээ танил болсон иргэдийн идэх дуртай “Нонгшим” бэлэн гоймонгоос хорт хавдар үүсгэдэг бензопирен хэмээх бодис илэрсэн талаар Азийн хэвлэл мэдээллийн хэрэгслээр шуугиж эхэллээ. Тухайлбал,  Хятадын “China Post” сайт тус улсын супермаркетууд өчигдрөөс эхлэн лангуунаасаа Солонгосоос импортоор орж ирсэн энэхүү гоймонг хурааж эхэлсэн талаар мэдээлсэн байна.

Түүнчлэн NHK телевизээр “Нонгшим” компани өөрийн бэлэн хоолнуудаа Японы зах зээлээс буцаан татаж эхэлсэн талаар мэдээллээ хэмээн Их Аварга Ассашёорюү Дагвадорж дөнгөж сая өөрийн Твиттертээ бичсэн юм.

Харин үүний хариуд ШӨХТГ-ын дарга О.Магнай “Би дөнгөж сая хариуцсан хүмүүст нь чиглэл өгсөн. Ирэх даваа гариг гэхэд дүгнэлт гаргаад нийтэд мэдээлнэ” гэлээ.

Солонгосын “Нонгшим групп” нь дэлхийн олон оронд бүтээгдэхүүнээ импортолдог бэлэн гоймонгийн томоохон зах зээлийг эзэлдэг юм.