Монгол Улсын Ерөнхий сайдын ивээл дор явагддаг иргэний андгай өргөх ёс­лол Төрийн ордонд бол­лоо. Уг ёслол өмнө нь Улс тунхагласны баярын өдөр болдог байсан бол энэ удаа эзэн Чингис хааны мэндэлсний 850 жилийн ойг угтан зохиогдож буйгаараа онцлог байв.
Энэхүү үйл ажиллагаанд Ерөнхий сайд Н.Алтанхуяг, Засгийн газрын хэрэг эрхлэх газрын дарга Ч.Сайхан­билэг, УИХ-ын гишүүн, залуу­чуудыг дэмжих “Лобби” бүл­гийн дарга Р.Гончигдорж болон  нийслэлийн тэргүүний сургуулиудын 850 сурагч оролцсон юм. Монголын түү­хэн дэх 37 их хааныг бэл­гэдэж, иргэний үнэмлэхээ гардан авсан нийслэлийн тэргүүний 37 сурагч Монгол Улсын иргэний андгай өргөлөө.
Ерөнхий сайд Н.Алтан­хуяг үйл ажиллагааг нээж хэлсэн үгэндээ “Их хаа­наа хүндэтгэж, эх түү­хээ дээдэлсэн үндэсний бахарх­лын өдрөөр амьдралд ганц тохиох нэр төртэй мөчөө хүндэтгэл дүүрэн өнгөрөөж байгаагаараа та нар азтай” хэмээн онцлов.
Мөн тэрбээр “Манай улс нэг хүнд ногдох Олимпийн медалийн тоогоороо дэлхийн орнуудаас долоодугаарт эрэм­­­­бэлэгдэж байгаад та­лар­­халтай ханддаг. Үүнд хүүх­дүүд та бүхний гавьяа их бий.
Олимпийн алдартнуудаа нэг удаа урамшуулаад өн­гөрөх биш насан туршид нь төрийн хайр халамж хүр­тээж байхаар тогтсон шийд­вэр залуу үеийнхэнд маань илүү өндөр тэмүүлэл бий болгосон” гэлээ.
УИХ-ын гишүүн, за­луу­чуудыг  дэмжих “Лобби” бүл­гийн дарга Р.Гончигдорж сурагчдад хандаж “Бидний ирээдүй болсон сурагчид та бүхэн Монголын бахархал их эзэн Чингис хааны мэндэлсэн өд­рөөр иргэний анд­гай тан­гараг өргөнө гэдэг их хувь завшаан.
Иргэний үнэмлэхээ ав­на гэдэг өөрөө өөрийнхөө ха­риуцлагыг үүрэх насандаа хүрсний илэрхийлэл. Дүү нар, та бүхэн өөрийн хүсэл зорилготой байгаарай. Хү­сэл зорилго гэдэг хүрээд ир­дэггүй учир зүтгэлтэй бай­гаарай” гэж хэлэв