Ерөнхий сайдын өгсөн чиглэлийн дагуу тус хүрээлэнд дасгал чийрэгжүүлэлтийн талбай, 2.5 км гүйлтийн цанын зам болон 40x40 хэмжээтэй мөсөн гулгуурын задгай талбай байгуулжээ. 

Богино хугацаанд хийж гүйцэтгэн нээлтээ хийж буй цанын зам, мөсөн гулгуурын талбайд иргэд ямар ч үнэ төлбөр төлөхгүйгээр гулгах боломжтойг Ерөнхий сайд онцоллоо. Түүнчлэн, хүүхэд залуусаа өвлийн спортын төрлүүдээр идэвхтэй хичээллүүлэхийн тулд нийслэл хотод ийм талбай олныг нэмж байгуулах хэрэгтэйг Засгийн газрын тэргүүн хэлээд өвлийн олимпийн аваргууд эндээс төрнө гэдэгт итгэж байна гэсэн юм. 

Мөн энэ үеэр 2014 оны параолимпийн эрхийн төлөө тэмцээнүүдэд оролцож буй Б.Ганзориг тэргүүтэй өвлийн спортын тамирчид Үндэсний цэцэрлэгт хүрээлэнд байгуулсан талбайд бэлтгэл хийхээр ирсэн байв. 

Цаашид энд халуун цай, ундаагаар үйлчлэх дулаан цэг бий болгох, цанын түрээсийн үйлчилгээ нэвтрүүлэх зэргээр иргэдэд илүү ая тухтай орчин бүрдүүлэхийг Ерөнхий сайд Н.Алтанхуяг хүрээлэнгийн удирдлагуудад даалгалаа. 

Засгийн газрын тэргүүн Соёл, спорт, аялал жуулчлалын сайд Ц.Оюунгэрэл, тус яамны Төрийн нарийн бичгийн дарга П.Алтангэрэл нарын хамт цанын зам, мөсөн гулгуурын талбайд гулгаж, нийслэлчүүдийг эрүүл агаарт спортоор хичээллэхийг уриаллаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.