Давосын Дэлхийн эдийн засгийн чуулга уулзалт (ДЭЗЧУ)-ын хүрээнд “Хариуцлагатай уул уурхайн хөгжлийн санаачлага – ашигт малтмалын үр шимийг хэрхэн зөв зохистой зохицуулах вэ” сэдвээр болсон хуралд Монгол Улсын Уул уурхайн сайд Д.Ганхуяг хүндэт зочноор оролцож, үг хэлэв.

Тус хуралд сайд Д.Ганхуягаас гадна Өмнөд Африкийн Ашигт малтмалын сайд С.Шабангу, Гвиней улсын Уул уурхайн сайд М.Л. Фофана, Чилийн Сангийн сайд Ф.Л.Баскунан, Австралийн Гадаад хэргийн сайд асан, Парламентын гишүүн Кевин Радд, Олон улсын шилжилт хөдөлгөөний Ерөнхий захирал В.Свинг, мөн уул уурхайн тэргүүлэх компанийн төлөөлөгчид оролцож, санал бодлоо илэн далангүй солилцов. 

Монгол Улс хариуцлагатай уул уурхайг хөгжүүлэх томоохон зорилт тавьсан тухай Уул уурхайн сайд Д.Ганхуяг хэлсэн үгэндээ тэмдэглэв. УИХ өнгөрсөн жил Стратегийн ач холбогдол бүхий салбарт үйл ажиллагаа явуулж байгаа аж ахуйн нэгжид гадаадын хөрөнгө оруулалтыг зохицуулах тухай хууль баталж, хариуцлагатай уул уурхайг хөгжүүлэх эхний алхам хийв. Улмаар Монгол Улсын Ерөнхийлөгч хариуцлагатай уул уурхайн суурийг тавихаар Ашигт малтмалын тухай шинэчилсэн хуулийн төсөл санаачилсан тухай сайд Д.Ганхуяг мэдэгдэв. Энэхүү хуулийн төслийг баталж, хэрэгжүүлсний дүнд уул уурхай нэгд, нийгмийн хариуцлагатай, хоёрт, байгаль, хүрээлэн буй орчинд халгүй, гуравт, Монголын ард түмэнд үр өгөөжтэй болно гэдгийг тэрээр онцлов. Байгалийн баялгаа дангаараа эзэмших бус хөрөнгө оруулагчидтай хамтран ажиллахын сацуу бизнесийн орчинг сайжруулахад Засгийн газар түлхүү анхаарна гэв.

Монгол Улс чөлөөт нийгэмтэй ардчилсан улс. Хөрөнгө оруулагчдаас мөн адил ил тод, хуулийг дээдлэхийг хүсдэг гэж сайд Д.Ганхуяг хэлэв.  Хариуцлагатай уул уурхай гэдэг бол хөрөнгө оруулагчид, бизнес эрхлэгчид, Монголын төр засаг, ард түмэн, орон нутаг бүгд адил тэгш, аль алиных нь эрх ашиг хамгаалагдсан байх учиртай гэлээ.