Зам, тээврийн сайд А.Гансүх уулзалтын үеэр “2013 онд авто зам, төмөр замын салбарт томоохон бүтээн байгуулалтын ажил эхэлнэ. Бид бүтээн байгуулалтын ажилд үндэсний компаниудаа дэмжиж ажиллах бодлогыг барьж байгаа. Зайлшгүй шаардлагатай, нарийн мэргэжил шаардсан ажилд л гадны ажиллах хүч авахыг чухалчилна” гэдгийг онцолсон юм.

Харин хөдөлмөрийн сайд Я.Санжмятав Зам, тээврийн яамны удирдлагуудад хандаж “Та бүхэн бүтээн байгуулалтын ажил гүйцэтгүүлэх тендерт шалгарсан компаниуддаа монгол ажилчид авах, дагалдуулах хэрэгтэй гэсэн нөхцлийг тавимаар байна. Мөн Хөдөлмөрийн яамны зүгээс мэргэжил олгох, мэргэжилтэй ажилчин бэлтгэх богино хугацааны сургалтуудыг зохион байгуулж байгаа. Эндээс төгсөгчдийг компаниуд дагалдангаар ажиллуулаад хөдөлмөрийн хөлсний доод хэмжээнээс эхлээд цалинжуулаад, эргээд өөрсдийн ажиллах хүчинтэй, иргэдээ ажилтай болгоход бодлогоор дэмжихийг хүсье” гэв.

Түүнчлэн тэрбээр гадаадаас ажиллах хүч оруулж ирэх компаниуд хүнийхээ тоог үнэн зөвөөр гаргаж өгдөггүйгээс Засгийн газрын квотыг хоосон тоогоор хаадаг тал дээр хяналт тавихыг холбогдох албаны хүмүүст анхааруулсан юм.