Гуравдагч орны хэвлэлүүдэд “Ким юу ч мөрөөдөн хүсэж байж болно. Гэхдээ эртнээс дайсагналцалтай АНУ, бусад хөрш орнуудаас гадна одоо бас нэг дайсан нэмлээ. Хятад Пхеньяны цөмийн туршилтад хэдийнээс дуугүй хүлцэнгүй хандаж ирсэн. Гэвч Кимийн бодол санаа хэдийнэ хил хязгаарыг мэдэхгүй алсад оджээ” хэмээн онцолжээ.

Хятадын хэвлэл мэдээллийн хэрэгслээр Хойд Солонгос энэ өдөөн хатгалгаа “маш өндөр үнээр төлнө” гэсэн нийтлэлүүд цацагдаж байгаа аж. Хятадын эрх баригчид “Хойд Солонгос дахин ийм үйлдэл гаргаваас цөмийн бөмбөг туршсанаасаа ч илүү өндөр төлөөс төлнө” гэсэн байр суурьтай байгаа бололтой.

Олон улсын ажиглагчид “Хятадууд Хойд Солонгосчуудыг пуужин хөөргөөгүй, бөмбөг дэлбэлж, Хятадын бүс нутгуудад ямар нэгэн аюул занал учруулаагүй тул ойлгож болно. Гэвч Хятадын шинэ удирдлага өмнөх удирдлагууд шигээ ойлгож хүлээн авахгүй ч байхыг үгүйсгэхгүй. Магад олон жилийн хамтын ажиллагаа нуран унахыг ч үгүйсгэхгүй” хэмээн мэдээлжээ. Наад зах нь Хятад худалдааныхаа хилийг хаачихвал Хойд Солонгост аюул нүүрлэж, цөмийн бөмбөг туршсанаасаа ч илүү их хохирол амсах магадлалтай гэнэ.

Ийнхүү гурвантаа цөмийн бөмбөг туршсан Хойд Солонгосын үйлдэл дэлхий нийтийн анхаарлын төвд буй бөгөөд энэ сарын 12-ны өдөр НҮБ энэ асуудлыг авч хэлэлцжээ. Хятадын гадаад хэргийн сайд Yang Jiechi энэ үйлдэлд маш их харамсаж байгаагаа илэрхийлж, энэ болчимгүй үйлдлээс болж Хойд Солонгост таагүй үр дагавар учирч болзошгүйг ч анхааруулжээ.  

АНУ-ын Ерөнхийлөгч Барак Обама “Хамгийн болчимгүй үйлдэл. Бид шаардлагатай тохиолдолд холбоо харилцаагаа эрхэмлэж зохих арга хэмжээг авах болно” гэж хэлсэн байна. Японы Ерөнхий сайд Чинзо Абе “Ухаалаг алхам биш” гэсэн бол НҮБ-ын Ерөнхий нарийн бичгийн дарга Бан Ги Мүн "цэвэр хүчирхийлэл" гэж мэдэгдсэн байна.