Долоо хоногийн өдрүүд өөрийн гэсэн эрхшээсэн гаригтай  байдаг бөгөөд тэдгээр нь бидний бие махбод, эрүүл мэндэд тодорхой нөлөө үзүүлдэг. Тиймээс гараг эрхсийн нөлөөг мэдэж, хоолны дэглэм сахих өдрийг сонговол эм, эмнэлэггүй эрүүл байх боломжтой гэнэ.

Даваа
Эрхшээсэн гариг нь Сар. Бидний хоол боловсруулах эрхтэн, шингэн ялгарах болон боловсрох, сүүний  булчирхайд  голлон нөлөөлдөг.  Өөрийн  биеийнхээ   эдгээр эрхтний үйл ажиллагааг сайжруулахыг хүсвэл энэ өдөр хоолоо хасч болно. Мөн элдэв харшилд ч Сар нөлөөлдөг тул ямарваа нэгэн зүйлээс харшил авдаг  бол энэ гаригт хоолоо сойж, дэглэм сахивал зохино.

Мягмар
Ангараг гариг  эрхшээдэг бөгөөд голлон хүний булчирхайн системийг хариуцдаг. Бидний түргэн хөдөлгөөн, архинд донтох эсэх, элдэв халдварт өвчинд өртөх, шарх үрэвсэх зэрэг нь  Ангарагаас  хамааралтай. Иймээс  энэ өдөр хоолоо сойж, дэглэм баривал таны булчин шөрмөс  уян хатан болох төдийгүй халдвар авахаас сэргийлэн, хурц  үрэвслээс хамгаална. Мөн энэ өдөр бор дарс хэтрүүлэн уух, шөнө оройн цагаар явахгүй байхыг чухалчилдаг байна.

Лхагва
Энэ өдөр мацаг баривал бие дэх бодисын солилцоо сайжирч, оюуны чадавхи дээшилнэ. Учир нь энэ өдрийг хий махбодитой Буд гариг эрхшээдэг.  Буд гариг мөнхийн залуу насыг бэлгэддэг тул та энэ өдөр хоолны дэглэм сахивал бие махбод тань залуужиж цус төлжинө.

Пүрэв
Бархасбадь гариг эрхшээдэг бөгөөд аливааг өргөжүүлэх боломжоор хангадаг. Өвчин хүндэрч ужгирсан, хэд хэдэн өвчнөөр өвдсөн, жин илүүдсэн, эрхтнүүдийн ачаалал ихэссэн тохиолдолд энэ өдөр мацаг баривал нэн зохилтой. Ингэснээр бие дэх өвчний хүндрэлийг арилган шинээр өвчлөхгүй байхад тустай. Мөн энэ гариг элэгний үйл ажиллагаанд нөлөөлдөг тул дэглэм баривал элэг идэвхжин үйл ажиллагаа нь сайжирна.

Баасан
Та гоо үзэсгэлэнтэй байхыг хүсвэл энэ өдөр мацаг бариарай. Учир нь энэ өдөр Сугар гаригийн эрхшээлд байдаг.  Мөн хоолой, бөөрний үйл ажиллагааг хариуцдаг тул дэглэм барьсан тохиолдолд дээрх эрхтнүүд идэвхжин эрүүлжих төдийгүй арьс өнгөний элдэв халдварт өвчин тусахгүй гэнэ.

Бямба
Хатуу дэгтэй,  хөндий хүйтэн Санчир гариг эрхшээнэ. Энэ өдөр та хоолны дэглэм мацаг баривал нуруу нугас, ясны гэмтэл, шүдний өвчин, үе мөчний болон арьсны элдэв өвчнөөс сэргийлж чадна. Турахыг хүссэн хэн боловч  Бямбад хоол сойх аваас хялбархан хүслээ биелүүлнэ.

Ням
Зүрх судасны болон цусны эргэлтийн системийг хариуцагч Нар захирдаг. Тиймээс энэ өдөр хоолоо хасах аваас дээрх эрхтнүүд эрүүлжихээс гадна энэ өдөр мацаг барьж өөрийгөө бүрэн цэвэршүүлж чадвал та өөдрөг үзэлтэй болж, хэн нэгний хайр сэтгэлийг татаж, бүтэлгүй дурлалын дурсамжаасаа ангижрах болно.

Бурханы шашны лам нар гүн бясалгал хийхдээ,  Сократ, Платон, Пифагор  зэрэг эртний Грекийн гүн ухаантнууд ном бичих, тодорхой ажил гүйцэтгэхийн тулд дээрх аргаар мацаг  барьж сэтгэхүйн хүч чадал, бие эрхтний эрүүл байдлаа  хадгалдаг байжээ.