Уулзалтын эхэнд парламентын тэргүүн АНУ-д саяхан айлчлахдаа Худалдааны яамны төлөөлөгчидтэй уулзаж, хоёр орны эдийн засгийн хамтын ажиллагааны талаар санал солилцсондоо баяртай байгаагаа илэрхийллээ. Түүнчлэн гуравдагч хөрш АНУ-ын хөрөнгө оруулалтыг нэмэгдүүлэхэд онцгой ач холбогдол өгч байгаагаа дурдаад  худалдааг тэнцвэржүүлэх, манай улсын экспортын нэр төрөл, хэмжээг нэмэгдүүлэх, ашигт малтмалын баялаг болон уламжлалт мал аж ахуйдаа тулгуурласан үндэсний үйлдвэрлэлийг хөгжүүлэхэд Америкийн техник, технологиос суралцах хүсэлтэй гэдгээ хэллээ.  

   Ноён Франциско Ж.Санчес хоёр улсын худалдаа, эдийн засгийн хамтын ажиллагааг нэмэгдүүлэх, тэр дундаа уул уурхайн салбарт хөрөнгө оруулж хамтран ажиллах саналтай байгаагаа илэрхийлсэн юм. Түүнчлэн стратегийн ач холбогдол бүхий салбар дахь эрх зүйн таатай өөрчлөлтүүдийг гадаадын хөрөнгө оруулагчид хүлээж байгааг мэдэгдлээ гэж УИХ-ын  Хэвлэл мэдээлэл, олон нийттэй харилцах хэлтсээс мэдээлэв.