Өнөөдөр нийгмийн салбар бүрт амжилттай ажиллаж байгаа лидерүүд амжилтад хүрсэн нууцаасаа хуваалцах “маш үнэтэй” лекцийг үнэ төлбөргүй авах боломжийг залуучууддаа МЗХ цуврал лекцээрээ дамжуулан хүргэж байгаа билээ. 03-р сарын 01-нээс эхлэсэн цуврал лекцийн анхны зочин олон улсын харилцаа судлалын профессор, онц бөгөөд бүрэн эрхт элчин, дипломатч Д.Баярхүү “Арабын хувьсгал” сэдвээр, III/07-нд “Гараг” студийн захирал Г.Бадамсамбуу “Монгол угсаатан, иргэншил” сэдвээр, III/15-нд Оюун ухааны акедемийн захирал Х.Хатанбаатар “Оюуны чадамж, бүтээлч сэтгэлгээ” сэдвээр, III/22-нд Сэтгэл судлаач, сэтгэл судлалын үндэсний төвийн гүйцэтгэх захирал Б.Ууганцэцэг “Сэтгэл зүйн фитнесс”, III/29-нд JCI Монгол байгууллагын үндэсний Ерөнхийлөгч Ц.Баатарбилэг “Залуучуудын оролцоо, нийгмийн хөгжил” сэдвээр залуучууддаа лекц уншиж, тэднийг сонсож нээлттэй ярилцлага өрнүүлсэн. Тэгвэл өнөөдөр буюу IV/5-нд МЗХ-ын Ерөнхийлөгч А.Мөнхбат “Аваръя, Оролцъё” сэдвээр лекц уншиж, нээлттэй ярилцлага өрнүүлэх юм байна. Залуучуудынхаа үзэл бодол, дуу хоолойг сонсож, чөлөөтэй ярилцах уг лекц МЗХ-ны Залуучуудын нээлттэй танхимд 17:00 цагаас болох юм. Оюутан залуус, сонирхсон хэн бүхнийг үнэ төлбөргүй энэхүү лекцэнд хүрэлцэн ирж, өөрт хэрэгтэй мэдлэг мэдээлэл олж авахыг уриалж байна.