Нийслэлийн Хан-Уул дүүргийн 13 дугаар хороо, Туул тосгонд байрлалтай “Түмэн шувуут” ХХК-ийн байранд тахиа үхсэн тухай мэдээлэл өнгөрсөн ням гарагт ирсний дагуу Мал эмнэлэг, үржлийн газар, Мэргэжлийн хяналтын ерөнхий газар, Нийслэлийн МХГ-ын хамтарсан ажлын хэсэг гарч ажилласан байна.Тус компанийн өндөглөгч шувуу байрладаг хоёрдугаар байранд өндөглөгч тахиа олноор үхсэн байсан бөгөөд үхсэн тахианаас түүврээр дээж авч тус компанийн мал эмнэлгийн лабораторид задлан хийжээ. Энэ үеэр шувууны томуу, ньюкасл өвчин илрүүлэх түргэн тестийн шинжилгээ хийж үзэхэд уг өвчин илрээгүй байна. Харин задлан хийсэн тахианаас эд эрхтний 15 дээж материалыг онош тодруулж, баталгаажуулах шинжилгээнд авчээ.Хорооны Засаг даргын захирамжаар ажлын хэсэг байгуулан, томилогдсон ажлын хэсэг нүх ухаж 18330 толгой үхсэн тахиаг устгаж, ариутгал халдваргүйжүүлт хийн, устгалын болон халдваргүйжүүлэлтийн акт бичсэн бөгөөд холбогдох арга хэмжээг шуурхай зохион байгуулж ажилласан байна.
