Монгол Улсын Шадар сайд М.Энхболд манай улсад ажлын айлчлал хийж  буй БНСУ-ын Төв банкны ерөнхийлөгч Чонсу Кимийг хүлээн авч уулзлаа.
Хоёр орны эдийн засгийн хамтын ажиллагааг өргөжүүлэх, төв банкуудын харилцааг хөгжүүлэх зорилгоор Монгол банк,  БНСУ-ын Төв банк хооронд хамтын ажиллагааны гэрээнд гарын үсэг зурсанд Шадар сайд М.Энхболд баяр хүргээд амжилт хүслээ.
Тэрбээр төв банкуудын хамтын ажиллагааг өргөжүүлэх, улмаар Солонгосын Tөв банкны дэмжлэгтэйгээр Монголын банкны салбарын мэргэжилтнүүдийг сургах, давтан сургах, мэргэжил дээшлүүлэх, богино хугацааны сургалтуудад хамруулах сонирхолтой байгаагаа илэрхийлээд төв банкуудын харилцаа улам идэвхжиж, харилцан ашигтай хамтын ажиллагааг хөгжүүлнэ гэдэгт итгэж байгаагаа хэлсэн юм. 
БНСУ-ын Төв банкны ерөнхийлөгч Чонсу Ким энэ үеэр Монгол Улс эдийн засгийн хөгжлийн чухал үед ирээд байгааг онцлоод энэ үеийг Монголын Засгийн газар амжилттай туулж чадаж байгаад бахархаж байгаагаа хэллээ. Мөн тэрбээр Монгол банктай хамтын ажиллагаагаа улам хөгжүүлэхийн төлөө ажиллах болно гэдгээ илэрхийлээд тус банкны боловсон хүчнийг бэлтгэх, мэргэжилтнүүдийг нь давтан сургахад анхаарч ажиллана гэдгээ энэхүү уулзалтын үеэр хэллээ.