Дэлхийн хамгийн өндөр настай эрэгтэй болох Салустиано Санчес Блазкуэз өнгөрсөн баасан гарагт таалал төгссөн байна. Нас сүүдэр 112 хүрээд байсан тэрээр АНУ-ын Монтана мужийн Гранд Айленд дэх асрамжийн газар амьдарч байжээ. Өнгөрсөн 6-р сард Японы иргэн 116 настай Жироемон Кимура нас барсны дараа Санчес дэлхийн хамгийн өндөр настай эрэгтэйд тооцогдох болсон юм.
Тэрээр 1901 оны 1-р сарын 08-нд Испанийн Эл Техадо Бехар хэмээх тосгонд мэндэлсэн бөгөөд 17-тойдоо өөрийн ах Педро болон бусад найзуудтайгаа Куба улсад ирж тариалангийн талбайд ажиллах болсноор ажил амьдралынх нь гараа эхэлжээ. Санчес 1920 онд Эллис арлаар дамжин АНУ-д ирснийхээ дараа нүүрсний уурхайд ажиллах болсон байна. Улмаар тэрээр Нью –Йоркт ирж суурьшсан бөгөөд 1934 онд эхнэр Пийрлтэйгээ гэрлэжээ. Санчес ийнхүү урт насалснаа өдөрт нэг ширхэг гадил жимс иддэгтэй холбон тайлбарладаг байсан байна.Гиннесийн дээд амжилтын номонд тэмдэглэснээр Японы иргэн 115 настай Мисао Окава нь одоогоор дэлхийн хамгийн өндөр настай эмэгтэй ажээ. Сонирхуулахад, хамгийн өндөр насалсан, энэ нь батлагдсан хүн бол Францын иргэн Жанна Кальман юм. Тэрээр 122 нас 5 сартайдаа хорвоогийн мөнх бусыг үзүүлсэн байна.
