Улаанбаатар хотод байгуулагдах, Кембрижийн ерөнхий боловсролын олон улсын хөтөлбөрөөр монгол, англи хос хэлээр хичээллэх, төрийн өмчийн лаборатори сургуулиудын VII, VIII, IX ангиудад сурагчдыг сонгон шалгаруулах болсон талаар бид өмнө нь мэдээлсэн билээ. Сонгон шалгаруулалтад оролцох сурагчид 2010-2011 оны хичээлийн жилд ерөнхий боловсролын сургуулийн V, VII, YIII ангийг төгссөн бөгөөд тухайн ангид судалсан хичээлүүдийн жилийн эцсийн дундаж үнэлгээ 80 хувь буюу түүнээс дээш байх ёстой юм байна.
Ийм шалгуурыг хангасан сурагчид сонгон шалгаруулалтад бүртгүүлэхдээ  суралцахыг дэмжсэн эцэг, эх, асран хамгаалагчийн гаргасан хүсэлт, төрсний гэрчилгээний хуулбар, сурагчийн хувийн хэрэг, сурагчийн одоогийн сурч буйг болон үнэлгээний дунджийг баталгаажуулсан сургуулийн тодорхойлолтоо авч ирэх шаардлагатай ажээ. Мөн шалгалтын хураамж 10000 төгрөг тушаах нь.
Бүртгэлийг өнөөдрөөс буюу 8 дугаар сарын 30-наас 9 дүгээр сарын 22-ныг дуустал ажлын өдрүүдэд 9:00 -18:00 цагт Боловсролын үнэлгээний төвийн байранд зохион байгуулах юм байна.
Сурагчдаас математикийн болон англи хэлний шалгалт авах бөгөөд шалгалтыг 2011 оны 9 дүгээр сарын 24-ны өдрийн 10:00 цагаас зохион байгуулж VII ангид 49 сурагч,  VIII ангид 55 сурагч, IX ангид 69 сурагчийг тус тус авах ажээ.
Шалгалтын дүнг 2011 оны 9 дүгээр сарын 24-ны өдөр Боловсролын үнэлгээний төвийн www.eec.mn цахим хуудсаар олон нийтэд мэдээлэх юм байна.
Г.Бурмаа