Сүхбаатар дүүргийн удирдах ажилтны ээлжит шуурхай хуралдаан болж өмнөх хуралдаанаас өгсөн үүрэг даалгаврын биелэлтийг авч хэлэлцэв. Үндэсний их баяр наадмыг угтах бэлтгэл ажлын хүрээнд төв цэнгэлдэх хүрээлэнгийн гаднах талбайн хариуцсан хэсгийн хог хаягдлыг бүрэн цэвэрлэж, зэрлэг ургамлыг устгаж 6 машин хог хаягдал, шарилж зэрлэгийг бүрэн цэвэрлэсэн байна. Мөн 12 усан оргилуурын ашиглалт хамгаалалтыг хариуцсан байгууллагуудад албан даалгаврыг хүргүүлж, нөхөн сэргээлтийг тогтмол хийж байх үүрэг өгчээ.

Бээжингийн гудамжны өргөтгөл, их тойруугийн авто замын гүүрэн гарц, зуслангийн чиглэлийн авто замын засвар болон шинэчлэлийн ажлуудад хяналт тавин ажиллаж байгаа юм. Дүүргийн Онцгой байдлын хэлтсээс ойрын өдрүүдэд бороотой байх тул үер усны аюулаас урьдчилан сэргийлж ажиллах талаар анхааруулж Онцгой комиссыг хуралдуулахаар боллоо.