Наадмын үеэр “Буриадын нэг өдөр” сэдэвт ардын аман зохиол, язгуур урлагийн хамтлагуудын уралдаан, үлгэр туульч ерөөлч магтаалчдын уралдаан, буриад ардын болон орчин үеийн дууны уралдаан болж, уламжлалт гар урлалын бүтээлийн үзэсгэлэн, “Дагинас” гоо бүсгүйн тэмцээн, Баримтат киноны өдөр зэрэг олон арга хэмжээ зохион явууллаа.
Уг наадмын баримтат киноны төрөлд 16 кино өрсөлдсөнөөс МN2 телевизийн найруулагч Б.Лхагвасүрэнгийн “Буриад аянгаа хабагша” хэмээх эртний мартагдсан буриад дууг орчин үеийн хүүхдүүдэд зааж сургаж байгаа тухай баримтат кино II байр эзэлж өргөмжлөл мөнгөн медаль, мөнгөн шагнал хүртлээ. МУСГЗ нэвтрүүлэгч Дарамын Батбаярын бэлтгэсэн Буриадын зан заншлыг орчин үетэй холбосон бүтээл тэргүүн байрыг эзэлсэн бол III байранд ӨМӨЗО-ны Шинхэний яруу найрагч Сэнжидийн нэг айлын амьдралыг харуулсан баримтат кино шалгарлаа.
Баримтат кино нь Буриадын түүх соёл, өв уламжлалыг харуулсан, баримтат киноны шаардлагыг хангасан, мэргэжлийн түвшинд 2012-2014 онд хийгдсэн бүтээлүүд байсан. 1994 оноос хойш хоёр жилд нэг удаа зохиогдож ирсэн “Алтаргана” наадам 20 дахь жилдээ боллоо.
