Хууль зүйн сайд Д.Дорлигжав өнөөдөр “Антарктидийн тухай гэрээнд нэгдэн орох тухай” хуулийн төслийг УИХ-д өргөн барилаа. Антарктидийн тухай гэрээ нь нийт 14 зүйлтэй ба тус гэрээнд Антарктидийг зөвхөн энхийн, цөмийн зэвсгээс ангид, судалгааны зорилгоор ашиглахыг тунхагласан Антарктидийн тухай анхны олон улсын эрх зүйн баримт бичиг юм.
Монгол Улс анх удаа 1972-1974 онд Антарктид тивийг судлах олон улсын судалгааны багт өөрийн мэргэжилтнээ оролцуулж байсан бөгөөд өнгөрсөн хугацаанд Монголын туйл судлаачид тус тивд судалгаа шинжилгээний ажил хийхдээ бусад улсын /ЗХУ, Болгар, Испани, Чили, Аргентин зэрэг/ Антарктид судлалын судалгааны багийн бүрэлдэхүүнд орж ажиллах замаар судалгаа хийж ирсэн болно. Ингэхдээ тэд дэлхийн уур амьсгалын өөрчлөлт, цаашдын хандлага, цаг агаарын прогноз гаргах, далайн усны болон эрдэс баялгийн судалгаа хийхэд өөрсдийн хувь нэмрээ оруулсан байна.
