Хөрөнгө оруулагчид болон үнэнч хэрэглэгчдээ олон сар хүлээлгэсний эцэст “Apple “компани CDMA, GSM сүлжээнд хоёуланд нь ажилладаг, илүү хүчин чадалтай камер мөн илүү хурдан чип бүхий шинэ iPhone утсаа танилцууллаа. “Apple”-ийн дэд ерөнхийлөгч Фил Шиллер шинэ бүтээгдэхүүнийхээ талаар мэдээлэл өгсөн байна.
PCMag.com сайтын ахлах шинжээч Саша Сеган iPhone 4S шинэлэг болж чадаагүй гэжээ.
Шинэ iPhone 4S-г гаднаас нь харахад iPhone 4-тэй адил байгаа юм. Харин гол өөрчлөлт болсон зүйл нь А5 чип бөгөөд энэ нь илүү их хүчин чадал, хурд шаардсан тоглоом тоглох боломжийг олгож байгаа гэнэ. Гэхдээ ихэнх хүмүүсийн анхаарлыг татсан зүйл нь дуу хоолой таних програм аж. Жишээ нь хэрэглэгч "Өнөөдөр цаг агаар ямар байх вэ?" гэж хэлэхэд утас энэхүү програмын тусламжтайгаар автоматаар хайлт хийн өнөөдрийн цаг агаарыг мэдээлдэг.
iPhone 4S  iPhone 4-г бодвол арай илүү хүчин чадалтай болсон ч цоо шинэ зүйлийг хүсч хүлээж байсан хэрэглэгчид сэтгэл дундуур байгаа юм. Шинжээч Саша Сеган хэлэхдээ хүмүүс Айфон5 гарна гэж итгэж байсан, гэхдээ тийм утас гарсангүй, хүмүүс сэтгэл гонсгор байгаа, бусад Андройд үйлдлийн системтэй утсуудтай өрсөлдөхийн тулд Айпль компани дараагийн загвараа гаргах хэрэгтэй гэжээ.
Э.АМАР