“Гуталт Муур” кино Эдди Мюрфигийн тоглосон "Tower Heist" хэмээх адал явдалт инээдмийн киног ардаа орхиж, шилдэг  киноны жагсаалтыг тэргүүллээ. Ихээхэн ашиг орлого олсон “Шрек” киноноос сэдэвлэсэн “Гуталт муур” хүүхэлдэйн кино театруудаар гарсан хоёр дахь долоо хоногтоо дэлхий даяарх тасалбар борлуулалтаасаа 48 сая Америк долларын ашиг олсон байна. Үүний 33 сая нь Америк, Канадын театруудын орлогоос орж ирснээр энэхүү 3D кино дотоодын шилдэг киноны жагсаалтад хоёр дахь долоо хоногтоо тэргүүлж байгаа юм байна.
 
Харин "Tower Heist" кино Хойд Америкт 25 сая долларын орлого олж, хоёрдугаар байранд оржээ. Энэ орлого студиудын төлөвлөснөөс бага байгаа юм. Энэ кинонд инээдмийн жүжигчин Мюрфи, Бэн Стиллер нараар ахлуулсан Манхэттэний ажилтнууд Уолл Стрийтийн луйварчнаас алдсан мөнгөө эргүүлэн авахын тулд дээрмийн төлөвлөгөө боловсруулж байгаа тухай гардаг байна.
Гуравдугаар байранд Хэролд Кумар нарт тохиолдсон бүтэлгүй явдлын тухай өгүүлдэг байна. "A Very Harold and Kumar 3D Christmas" кино дотоодын зах зээлээс 13 сая долларын орлого олжээ. Кино бүтээгчид энэ кино дор хаяж 15 сая долларын ашиг олно гэж тооцоолж байсан байна.
Дөрөвдүгээр байранд бага төсвөөр бүтсэн аймшгийн цуврал кино болох Paranormal Activity 3 (Ер бусын үйл ажиллагаа 3) оржээ. Энэ кино 8.5 сая долларын орлого олсон байна.
Э.АМАР