Дэлхийн шинэ дээд амжилт тогтоох зорилгоор Өвөрмонголын Алшаа аймагт өнгөрсөн амралтын өдрүүдээр 555 тэмээний уралдаан зохиожээ. Энэхүү уралдаанд оролцогчид 5 км зайд тэмээнийхээ хурд хүчийг сорьсон байна. Дэлхийн гиннесийн номны төлөөлөгч Ву Жион дээд амжилтын батламжийг гардуулан өгчээ. Тэрээр хэлэхдээ энэ удаа хамгийн олон тэмээ уралдуулж, Гиннесийн дээд амжилт тогтоолоо гэсэн байна.
Уралдаан зохиогдохоос зургаан сарын өмнө оролцогчид тэмээгээ сойж бэлтгэжээ. Өвөрмонголд хурим найр, уулзалт цугларалтын үеэр голцуу тэмээ уралдуулдаг байна.
Гаршуулсан тэмээний тоо толгой ойролцоогоор 1.4 сая байна.
Харин олон улсын байгаль хамгаалах холбоо зэрлэг тэмээ буюу хавтгайг устаж үгүй болох аюулд орсон амьтдын тоонд оруулжээ. Хятадын баруун хойд хэсэгт болон Монголд 800 орчим хавтгай амьдарч байна гэсэн судалгааг 2002 оны 10-р сард гаргасан байна.
Э.АМАР