Монголын циркийн түүх нэгэн шинэ хуудсаар баяжлаа. Монакогийн Вант Улсад болдог Циркийн наадам бол дэлхийн циркчдийн хувьд спортоор харьцуулбал Олимп нь, Дэлхийн аварга нь билээ. Энэ жил, 1 дүгээр сарын 19-нөөс 29-ний өдрүүдэд уламжлалт 36 дахь удаагийн наадам болж байгаа юм.

36 жилийн энэхүү их тэмцээний түүхэнд манайх хоёр удаагаа төрийнхөө далбааг Монакогийн тэнгэрт мандуулсан амжилттай. Анх 1985 онд эгч дүү Эрдэнэтуяа, Оюунчимэг нар уран нугаралтаар “мөнгөн алиалагч”, үүний дараа Blue Sky Girls хамтлаг мөн уран нугаралтаар “хүрэл алиалагч” цом хүртэж байсан юм. Угаасаа дэлхийн циркт Монголын уран нугаралт бренд нэр болсон төрөл.

Тэгвэл энэ удаад Монголын циркчид анх удаа акробатын төрлөөр дэлхийд нэрээ тамгалж, түүхэндээ шинэ хуудас нээлээ. Монте-Карлогийн 36 дахь наадмаас Circus Khadgaa Mongolia буюу Хадгаа Циркийн акробатчид “хүрэл алиалагч” цом хүртээд байна.

“Алтан алиалагч” цом буюу нэгдүгээр байрыг Шанхайн 22 жүжигчинтэй шидэх банзтай акро-батчид, мөн Францын сургуультай зааны тоглолт хүртсэн бол “Мөнгөн алиалагч” цом буюу хоёрдугаар байрыг Оросын акробатчид болон Украины сургуультай арслангийн тоглолт, харин “Хүрэл алиалагч”-ийг манай Хадгаа циркийнхэнтэй хамт Бразилийн агаарын нисэгчид хүртсэн байна.

Медаль хүртсэн Strong Acrobat хэмээх үзүүлбэрийг тус циркийг үндэслэгч, жүжигчин, найруулагч Чулуунцэндийн Хатанбаатар хагас жилийн хугацаанд найруулсан аж. Олимп, дэлхийн аваргад оролцож буй тамирчид медалийн үзүүрээс атгасан даруйд Ерөнхийлөгч зарлигаа гарган, “гавьяат” цол олгодог уламжлал боксчин Үйтүмэнгийн амжилтаас хойш тогтоод байгаа. Тиймээс ч Циркийн олимпийн энэхүү наадмын эзэнд Ерөнхийлөгч “гавьяат” цолыг шууд олгоно хэмээн итгэж байна.

Монакогийн тэнгэрт намирсан Монголын далбаан д ор мэхиймүй. Монгол циркчдийнхээ амжилт, авьяасанд бишрэн мөргөмүй.

М.Саруул-Эрдэнэ
МОНЦАМЭ