Африк тивийн Сахелийн бү­сийн орнуудад амьдардаг 13 сая хүн «хүнсний асуудалтай» тулгарсан нь цаашдаа хүмүүн­лэгийн сүйрэлд ч хүргэж бол­зошгүй байна. Энэ тухай «Оксфам» гэдэг олон улсын буяны байгууллагын мэдээлэлд дурджээ.
Сүйрэлд өртөж болзошгүй орнуудын тоонд Чад, Буркина-Фасо, Мали, Мавритани, Нигер болон Сенегал улсын хойд хэсэг багтаж байна. Эдгээр оронд сая гаруй хүүхэд өлсөн туйлдаж байгаа тухай баримтыг тус байгууллагын мэдэгдэлд дурджээ.
Энэ удаагийн хүнсний хям­рал нь ган гачиг, хүнсний бүтээгдэхүүний хэт өндөр үнэ, ядуурал болон бүс нутагт байнга өрнөдөг зөрчил тэмцэлдээнээс үүдэлтэй юм.
«Оксфам» байгууллагын Ба­руун Африкийн салбарын захирал Мамаду Битие ярихдаа «дэлхийн хамтын нийгэмлэг цаг алдалгүй арга хэмжээ аваагүй учраас өн­гөрсөн жил Хойд Африкт байдал хэрхэн хүндэрснийг бид бүгд мэдэж байгаа, харин одоо даруй­хан хөдөлж эхэлвээс сая сая хүний амийг аврах боломж байна» гэдгийг онцлон тэмдэглэжээ. Одоогоор Сахелийн бүсийн ард иргэдэд нийтдээ 37 сая ор­чим долларын хүнсний тусламж шаардлагатай байна.
Б.Адъяахүү
МОНЦАМЭ