Эмэгтэй чөлөөт бөхийн Дэлхийн цомын төлөө тэмцээн, Ази тивийн өсвөр үеийн аварга шалгаруулах тэмцээн 2013 онд Монгол Улсын нийслэл Улаанбаатар хотноо болно.
Олон улсын бөхийн төрлүүдийн нэгдсэн холбоо /ФИЛА/-ноос 2013-2015 онуудад явуулах насанд хүрэгчид, залуучууд, өсвөр үеийн дэлхийн болон тивийн аварга шалгаруулах тэмцээн, тивийн тоглолт, Дэлхийн цомын төлөө тэмцээнүүдийн хуваарийг тодруулсаар байгаа юм. Насанд хүрэгчдийн ДАШТ-ийг 2013 онд Унгар Улсын Будапешт, 2014 онд Узбек Улсын Ташкент хотод зохион байгуулахаар болжээ. Ази тивийн насанд хүрэгчдийн аварга шалгаруулах тэмцээн 2013 онд Энэтхэг Улсын шинэ Дели хотод, Азийн наадам 2014 онд БНСУ-ын Инчон хотод, оюутны ДАШТ 2014 онд Унгар Улсын Печ хотод тус тус болно.
Манай улсын хувьд 2013 оны гуравдугаар сарын 2-3-ны өдрүүдэд эмэгтэй чөлөөт бөхийн Дэлхийн цомын төлөө тэмцээн, долдугаар сарын 25-28-нд Ази тивийн өсвөр үеийн аварга шалгаруулах тэмцээнийг эх орондоотус тус зохиох юм.
2016 онд Бразил Улсын Рио де Жанейро хотод болох зуны Олимпийн наадамд оролцох эрхийг олгох эхний тэмцээн болох ДАШТ-ий тов одоогоор гараагүй байна.
Д.Өлзий
МОНЦАМЭ