Пол Маккартнийн хүү Жеймс «Битлз-2» хамтлаг байгуула¬хаар төлөвлөж байгаа гэнэ. Уг хамтлагийн бүрэлдэхүүнд Ленноны хүү Шон бас Харрисоны хүү Дхани нар орох аж.
«Би ийм хамтлаг байгуулахад бэлэн. Шон, Дхани нар ч дуртай зөвшөөрөх байх» гэж Жеймс Маккартни «Битлз-2» хамтлаг байгуулагдах эсэх талаар сонирхсон сэтгүүлчдийн асуултад хариулахдаа хэлжээ.
Пол Маккартнийн ганц хүү болох Жеймс өдгөө 34 настай бөгөөд 2001 оноос эхлэн аавынхаа цомгийн бичлэгт оролцжээ. Тэрбээр Driving Rain (2001) цомогт нь багтсан «Spinning On An Axis», «Back In The Sunshine Again» дуунууд дээр хамтран ажилласан байна.
2005 онд Маккартниг Хойд Америкт аялан тоглолт хийхэд нь хамт явсан байна. Харин 2008 оноос эхлэн өөрийн цомгоо гаргаж эхэлсэн бол 2009 оноос «Light» гэдэг нууц нэрээр тоглож эхэлжээ. 2010 онд өөрийнхөө анхны «Available Light» гэдэг цомгоо гаргасан бол жилийн дараа «Close At Hand» цомгоо гаргасан байна.
Өдгөө 36 настай Шон Леннон бүр бага байхаасаа л ээж Йоко Оногийнхоо бичлэгт оролцож байжээ. Харин 2001 оноос бие даан хөгжмийн ертөнцөд хөл тавив.
Харин 33 настай Дхани Харрисон эцгийнхээ дуусгаж амжаагүй байсан «Brainwashed» цомгийг гүйцээн 2002 онд гаргажээ. Мөн Эрик Клэптоны «Жоржид зориулсан концерт»-ыг зохион байгуулахад нь оролцож байв. Тэрбээр 2006 онд «thenewno2» гэдэг хамтлаг байгуулж байсан бол 2010 онд «Fistful of Mercy» хамтлагаа бүрдүүлжээ.
«Битлз-2» хамтлаг байгуулагдах эсэхэд эргэлзэж байгаа цорын ганц хүн бол бөмбөрчин Ринго Старрын хүү Зак Старр юм.