Эх сурвалжийн мэдээлснээр “SGS” компани “CHALCO” группт 60 хүр­тэлх хувиа зарахаар болж, энэ сарын нэгэнд гэрээ­гээ албан ёсоор үзэглэжээ. Гэрээнд зааснаар “CHALCO” групп “SGS”-ийн нэгж хувьцааг нь 6.75 ам.дол­лараар үнэлж, 891сая ам.дол­лараар худалдаж авахаар болсон байна. Өөрөөр хэлбэл Р.Фрийдланд Монголын газрын баялгийг дахин 891сая ам.доллараар хятадуудад зарчихлаа.  
Энэхүү мэдээлэл олон нийтэд цацагдсанаас хойш Хонгконгийн хөрөнгийн бирж дээр нэгж хувьцааны ханш 16 хувиар өсчээ. Харин “SGS”-ийн 57.6 хувийг эзэмшдэг “Айвенхоу майнз” ХХК-ийн эзэн Фрийдланд өөрийн хувийг “CHALCO” группт хэрхэн шилжүүлэх тухай тусгай зөвшилцлийн гэрээ байгуулсан байна.
Улмаар “SGS”-ийн Захир­луудын зөвлөлийн дэргэд тусгай хороо байгуулж, зөвлөлийн даргаар Пьерр Лебел, гишүүдэд Гордон Лан­кастер, Андре Дийп­вэл, роберт Хэнсон нарыг томилжээ. Харин санхүү, хуулийн хараат бус зөвлөхөөр “Blake”, “Cassels & Graydon” компаниудыг хөлслөн ажиллуулж байна.
Энэ гэрээг байгуулсны дараа “SGS”-ийн зүгээс тусгай хорооны зөвлөлөөс үүрэг чиглэл өгтөл хувьцаа эзэмшигчдийг ямар нэгэн үйл ажиллагаа явуулахыг хоригложээ.
Хамгийн гол нь энэ гэрээ хийгдсэнээр “SGS” Овоот толгойгоос олборлосон нүүрсээ зөвхөн Хятадын “CHALCO” группт зарах юм байна. Үүний хүрээнд “CHALCO” групптэй 24 сарын хугацаанд зах зээ­лийн ханшаар нүүрс зарахаар тохиролцжээ. Ингэс­нээр Фрийдландын олон жил төлөвлөсөн төлөвлөгөө ал­хам алхмаар биеллээ олж байна.
2009 онд Хятадын хөрөн­гө оруулалтын кор­пораци “SGS”-ийн 30 хувийг 500 сая ам.доллараар худал­дан авсан байдаг. Үүний дараа “Айвенхоу майнз”-ын ерөнхийлөгч Фрийдланд 57.6 хувийг нь эзэшдэг болсон. Гэвч Фрийдланд “SGS”-ийг зарах төлөвлөгөөг хэдэн жилийн турш боловс­руулсны эцэст Овоот толгой, Цагаан толгой, Сүмбэр гэсэн ашиглалтын орд бүхий “SGS” компанийг Хятадын “CHALCO” групп эзэмших нөх­цөл бүрджээ.
Эдгээр орд нийлээд бараг 600 сая тонн нүүрсний нөөцтэй аж. Энэхүү ордууд БНХАУ-ын хилээс 50 км хүрэхгүй зайд байрладаг тул хятадуудын шуналыг асар их хөдөлгөсөөр ирсэн юм. Иймээс хятадууд “SGS”-ийг авах нь жилийн өмнөөс тодорхой болоод байв.
“CHALCO” группийн энэ гэрээ Монголын нүүрсний зах зээлийг үндсэнд нь үнэгүйдүүлэх эхлэл гэж хэлэхэд болно.
Монгол Улсын Засгийн газар “CHALCO” групптэй Таван толгой ордын Зүүн цанхиас олборлож байгаа нүүрсийг тонныг нь 70 ам.доллараар авахаар гэрээ хийсэн.  Гэрээний хүрээнд Монголын Засгийн газар 250 тэр­бум төгрөг авчихсан. Энэ мөнгөө эх орны хувь, хишиг нэрээр иргэн бүрт олгож байна. Гэтэл энэ гэрээ, хэлэлцээрийн цаана хятадууд Монголын коксжих нүүрс­ний зах зээлийг бүрэн хяналт­даа авчээ.

Эх сурвалж: Өглөөний сонин