Орон нутгийн иргэд “Уг нь Тарагт сумын орон нутгийг судлах музейд хадгалж байсан. Улаанбаатарт болсон Өвөрхангай аймгийг сурталчлах нэг арга хэмжээнд тавихаар аваачихад Улаанбаатарт буй өвөрхангайчууд сүслэн залбирч байсан юм. Тэр арга хэмжээ өндөрлөж, тамгыг авчирснаас хойш музейд тавиагүй, харин Засаг даргын өрөөнд байсныг иргэд харсан байдаг. Суугаа арслангийн дүрс бүхий бариултай, гурван кг жинтэй, гуулин тамгыг нутгийн хэн ч харсан танина. Тухайн үед Тарагт сумын Засаг даргаар С.Бат-Эрдэнэ гэдэг хүн ажиллаж байсан. Түүний өрөөнөөс алдагдсан гэж Цагдаагийнхан шалгаад, тэгсхийгээд чимээгүй болсон” гэсэн юм.
Өвөрхангай аймгийн хууль хяналтын байгууллагынхнаас энэ талаар лавлахад “Уг хэргийг шалгаад хэрэгсэхгүй болгосон. Энэ хэрэгт Засаг даргын хүү Б.Ганболд холбогдсон. Ээж нь музейн эрхлэгч байхдаа тамгыг нөхрийнхөө өрөөнд тавьжээ. Засаг дарга С.БатЭрдэнийн хүү аавынхаа өрөөнөөс Агь үйзэн вангийн тамгыг хулгайлан хүмүүст худалдсан байсан. Дээр үед уг тамгыг 40 мянган төгрөгөөр үнэлж, шинээр үнэлгээ тогтоогоогүй байсан учраас хохирлын хэмжээ нь хүрээгүй гэсэн үндэслэлээр хэрэгсэхгүй болгосон” гэж ярив. Энэ хэргийг замхрахад үнэлгээ тогтоох, дахин сэргээн үнэлэх ажил хийх ёстой хүмүүсийн буруугаас, тэдний ажлын уялдаа холбоо байхгүйгээс гэмт этгээд ял завшихад хүрчээ.
Уг тамгыг БНХАУ руу гаргасан бөгөөд чухам хэнээр дамжуулж, хэн гэгч этгээд авч гарсан нь тодорхойгүй байгаа юм. Агь үйзэн вангийн хошууны тамгыг хил давуулж хятадуудад өгсөн нь манай түүх соёлын дурсгалт зүйлсийг хил давуулахад оролцдог монгол хятад иргэд, түүнийг нь харсан ч хараагүй юм шиг өнгөрдөг хил, гаалийн ажилтнууд байдаг гэхэд хилсдэхгүй.
