АНУ-ын цагдаа нар гар утас хулгайлах эсвэл дээрэмддэг бүлгүүдийн эсрэг ажиллагаа явуулж байна. Гэмт этгээдүүд хууль бус аргаар олж авсан гар утсаа хямдаар зардаг байна. Хэдэн сарын өмнө сагсны Жордан пүүз хамгийн эрэлттэй бараа болж, гэмт этгээдүүд хүнээс хулгайлах эсвэл дээрэмдэж байсан. Харин одоо доод тал нь 500 орчим долларын үнэтэй ухаалаг гар утас болон iPhone зэрэг утас хулгайчдын бай болоод байна. Учир нь гар утас үнэд хүрдэг, ил барьж явдаг учир хулгайлах эсвэл дээрэмдэхэд хялбар байдаг. Нийслэл Вашингтон хотын цагдаагийн албан хаагч Кати Лэйниерийн ярьж байгаагаар гэмт этгээдүүд нялх хүүхдээ тэргэнд түрээд явж байсан нэгэн эмэгтэйн нүүр лүү цохиж гэмтээгээд гар утсыг нь булаагаад зугтсан хэрэг хүртэл гарчээ. Өнгөрсөн жил 27 мянган утас хулгайд алдагдсан гэж бүртгэгдсэн байна. Нью-Йоркийн цагдаагийн газрын мэдэгдэж байгаагаар хотын нийт хулгайн гэмт хэргийн 8 хувь нь гар утасны хулгай байсан бол энэ жил 40 болтлоо нэмэгджээ. Мэргэжлийн хүмүүс гар утас алдгдсан тохиолдолд өөрөө автоматаар түгжигддэг өөр хүн хэрэглэх боломжгүй болдог програмыг утсандаа суулгахыг зөвлөж байна. Ухаалаг гар утас үйлдвэрлэгчид ч мөн ирээдүйд түгжигчтэй, эзнээс нь өөр хүн ашиглах боломжгүй програмтай гар утас үйлдвэрлэхээр зэхэж байна. Жишээ нь iPhone утсан дээр алдагдсан утас хаана байгааг олж болдог програм байдаг. Интернетэд ороод алдагдсан утас хаана байгааг олж, мэдээд цагдаад хандахад болох юм байна. “Иргэдэд хандаж хэлэхэд хууль хүчий байгууллага иргэдийн аюулгүй байдлыг сахиулж ажиллаж байгаа. Харин гэмт хэрэгтнүүдэд хандаж хэлэхэд хууль хүчний байгууллага та бүгдийг мөшгиж байна. хүний гар утас хулгайлж, зарах боломжгүй болж байна. Тиймээс та хэд цагаа дэмий үрэх хэрэгггүй” гэж Харилцаа Холбооны Хорооны  дарга Жулиус Генаковски мэдэгдсэн байна.
Shuum.mn