Түүнийхээр бол Мон­голын ард түмний нийт гадаад өр 2011 оны байдлаар 9.6 тэрбум ам.долларт хүрчээ. Үүний дотор 7.5 тэрбум ам.долларын өрийг 2008 оноос хойш засаг барьсан нөхөд тавьсан гэлээ. Дөрөвхөн жилд тавьсан 7.5 тэрбум ам.долларын гадаад өрийн дийлэнх хувийг МАН, АН-ын олигархиудын компанийх хэмээн сүржигнэв. Улмаар гишүүн Ц.Шинэбаяр хэн гэдэг эзэнтэй, ямар компани, хэний баталгаагаар ийм  хэмжээний өр тавьсныг удаа дараа асууж, тодруулах гэсэн ч Төвбанк нуун дарагдуулсан хэмээн “гомдоллож” байгаа.

Хувийн компани биш Монголын ард түмний банк бол ард түмнээсээ юуг ч нуух ёсгүй учраас өрийн учрыг олж эх орноо цэвэрлэхийн тулд АН, МАН-ын шударга гишүүд хүчээ нэгтгэн, 2012 оны сонгуулийн өмнө сайн дурын төрийн бус байгууллага болох намуудыг бүгдийг нь татан булгаж, улс­төр, эдийн засгийн гэмт хэргийг таслан зогсоох ёстой хэмээн Ц.Шинэбаяр уриал­сан. Гэтэл гадаад өр зохистой хэмжээнээс хэт­рээгүй, өөрөөр хэлбэл үндэсний аюулгүй байдалд нө­лөөлөх хэмжээнд хүрээ­гүйг Гадаад харилцааны сайд Г.Зан­даншатар, Сангийн дэд сайд Ч.Ганхуяг нар албан ёсоор зарлалаа.

Нийт гадаад өрийн 2.2 тэрбум ам.доллар нь Засгийн газарт хамааралтай бөгөөд үлдсэн 7.4 тэрбум ам.доллар нь хувийн хэвшил, түүн дотроо банк, банк бус байгууллагын өр байгаа гэдгийг Монголбанкны албан ёсны мэдээлэлд дурджээ. Засгийн газар өнгөрсөн онд 257.9 тэрбум төгрөгийн гадаад зээл авч ашиглан, өрийн үлдэгдэл 2011 оны гүйцэтгэлээр 2,650.9 тэрбум төгрөг байна. Нийт зээлийн үлдэгд­лийн 66.2 хувийг төслийн, 21.6 хувийг сан­хүүгийн, 10.3 хувийг авто замын, 1.6 хувийг хөтөл­бөрийн зээл, үлдсэн 0.3 хувийг Олон улсын валютын сангийн зээл эзэлж байгаа тухай Сангийн яамны танил­цуулгад дурджээ.

Тэгвэл дотоод өрийн үлдэг­дэл мөн оны гүйцэт­гэлээр 503.3 тэрбум төгрөг болж. Төсвийн алдагдал, улирлын чанартай дутагдал болон орон сууц, жижиг, дунд үйлдвэр, ноос, ноолуурын салбарыг дэмжих, зарим ажлыг санхүүжүүлэх зорил­гоор Засгийн газар өнгөрсөн онд 358.3 тэрбум төгрөгийн үнэт цаас гарган арилжаалж, эргэн төлөлтөд 20 тэрбум төгрөг төлсөн байна.

Засгийн газрын нийт өр өнгөрсөн онд 3,154.2 тэрбум төгрөг болсныг Засгийн газрын хуралдаанаар тайлагнан хэлэлцсэн албаны эх сурвалж бүх хэвлэл мэдээлийн хэрэгслээр цацагдлаа.

Ингээд Монгол Улс гадаадад 7,6 тэрбум ам.долларын өртэй гээд сенсаци тарьчих гэсэн боловч үнэн хэрэгтээ “Голомт”, “МАК”, “Ерөө гол” зэрэг компани түншүүдтэйгээ хувийн шугамаар гэрээ хэлцлээр авсан 7.6 тэрбум ногоон байлаа. Манай улсын гадаад орнуудаас авсан зээлийн хэмжээг шилжилтийн 1990-ээд оны үеэс авч үзвэл 2,3 тэрбум ам.доллар. Манай Дотоодын нийтийн бүтээгдэхүүн энэ онд 14 их наяд төгрөгт хүрэх тооцооноос үзвэл түүний 20 хувьтай л тэнцэх зээлтэй байна гэсэн үг аж. Төсвийн тогтвортой байдлын хуульд заасан манай улсын нийт өр ДНБ-ий 40 хувиас хэтрэхгүй байх тусгай шаардлагыг манай улс ирэх жилээс бүрэн хангаад явах бололцоотойг Сангийн яам мэдэгдэж байна. Төр засаг бужигнаж, түмэн олон бухимдаж л байвал кайф авдаг улстөрчид байх юм.

Ард түмний элч болж суугаа парламент гэгчийн нэг гишүүн, тухайлбал, Ц.Шинэбаярын улстөр ийм л байна. Түүнд олон нийтийн эрх ашиг биш өөрийнх нь эрх ашиг хамгийн чухал байгаа нь тодорхой байна. Адуунчулуунаа алдвал л үхэхээс наагуур болно гэж ард түмний толгой дээгүүр харайлган дураараа аашилж байна. Тэгвэл Адуунчулуун ч үгүй байгаа энгийн ард яах болж байна. Тэдэнд бүр амьд явах ч утгагүй юм байна л даа.

Эх сурвалж: Өглөөний сонин