The Avengers буюу Өшөө Авагчид кино дээд амжилт тогтоолоо, Линдсэй Лоханыг авто ослын хэрэгт  буруутай гэдгийг нотлох баримт хангалтгүй гэж үзсэн байна зэрэг хамгийн сүүлийн үеийн энтертайнмент мэдээллийн товчоос хүргье.
Холливүдэд ашиг орлогоороо тэргүүлж байгаа шилдэг кинонуудын талаарх мэдээллийг хүргье. The Avengers буюу Өшөө Авагчид кино таван супер баатар нэг баатраас илүү гэдгийг баталж байна. Учир нь энэ кино нээлтээ хийснийхээ дараах амралтын өдрүүдээр Хойд Америкийн кино театрууд дахь тасалбар борлуулалтаасaa 200.3 сая долларын орлого олж, дээд амжилт тогтоожээ. Harry Potter and the Deathly Hollows - Part 2 кино өнгөрсөн онд нээлтээ хийснийхээ дараахан 169.2 сая долларын ашиг олж байсан юм. The Avengers кино дөрөвдүгээр сарын 25-нд олон улсад нээлтээ хийснээс хойш нийтдээ 641 сая долларын орлого олсон байна.
Өнгөрсөн амралтын өдрүүдээр "Think Like a Man" буюу "Эр хүн шиг Сэтгэ" хэмээх романтик, инээдмийн кино найман сая долларын орлогоор хоёрдугаарт бичигдсэн бол "Өлсгөлөн Тоглоом" кино 5.7 сая долларын орлогоор гуравдугаарт оржээ.
Нэг хэсэг нилээд асуудалд орооцолдсон Линдсэй Лоханы талаар нааштай мэдээ гарсан байна. Лоханыг авто осол гарсан газраас зугтсан гэж буруутгаад байсан бөгөөд цагдаа нар түүнийг  энэ хэрэгтэй холбогдуулан шалгахыг Лос Анжелес хотын прокуроруудаас хүсчээ. Гэвч прокурорууд түүнийг буруутай гэдгийг нотлох баримт хангалтгүй гэж үзсэн байна.
Бен Стиллер, Виинс Ваун нарын тоглосон "Neighborhood Watch" киноны нэрийг The Watch болгон өөрчлөхөөр болжээ. 20-р зуун Фокс студиэс мэдээлснээр хүмүүст санамсаргүйгээр буруу сэтгэгдэл төрүүлэхээс зайлсхийх зорилгоор киноны нэрийг өөрчилсөн байна.
Э.АМАР