Ням гаригт найруулагч Михаэль Ханеке хайр дурлал, үхлийн тухай өгүүлдэг "Amour" буюу "Хайр Дурлал" киногоороо Каннын кино наадмын тэргүүн шагналыг хоёр дахь удаагаа хүртсэн байна. Австри найруулагчийн кинонд Франц жүжигчид болох 85 настай Эммануэль Рива, 81 настай Жан Луи Трентиньян нар тогложээ.
Ханеке сүүлийн жилүүдэд Хөгжилтэй Тоглоом, Далд зэрэг 10 гаруй киногоороо Каннын наадамд оролцсон байна. Тэрээр 2009 онд "Цагаан Тууз" киногоороо энэ кино наадмын Алтан дал мод шагналыг хүртэж байсан билээ.
Энэ жилийн наадмын шилдэг эрэгтэй жүжигчний шагналыг "Мөрдлөг" кинонд тоглосон Данийн жүжигчин Мэдс Миккельсэн авчээ.
Харин шилдэг эмэгтэй жүжигчний шагналыг Румыний "Уулсын Цаана" кинонд тоглосон Кристина Флутур, Космина Стратан нарт олгосон байна.
Шүүгчид хоёрдугаар байрын шагналыг Маттео Гароннегийн найруулсан инээдмийн кино болох "Бодит Байдал", гуравдугаар байрын шагналыг Кен Лоучийн "The Angels' Share" кинонд олгосон байна.
Харин Мексикийн Карлос Рэйгадас шилдэг найруулагчаар шалгарчээ. Тэрээр сюрреализмын чиглэлийн "Post Tenebras Lux" киног найруулсан байна.
Италийн найруулагч Нанни Мореттигоор ахлуулсан шүүгчдийн баг шагналын эздийг 22 өрсөлдөгчд дундаас шалгаруулжээ.
12 өдөр үргэлжилсэн Каннын кино наадамд Брэд Питт, Никол Кидман, Роберт Паттинсон, Кристен Стюарт зэрэг алдартай одууд оролцсон юм.
Э.АМАР