Өнгөрсөн ням гарагт Британийн хатан хаан II Елизаветагийн хаан ширээнд заларсны 60 жилийн ойд зориулж Темза мөрөнд болсон усан парадад хамгийн олон тооны хөлөг онгоц оролцсон нь Гиннессийн номонд бичигдэх амжилт болсныг Би-Би-Си агентлаг уламжиллаа.
Баяр ёслолын ажиллагаанд 1000 орчим хөлөг онгоц, завь оролцсон бөгөөд хатан хаан болоод хатан хааны гэр бүлийн гишүүд "алмаазан ойд" зориулж тусгайлан бүтээсэн "Спирит от Чартуэлл" хөлөг онгоцоор зорчсон байна.
Усан парад зургаан цаг үргэлжилж түүнд нийтдээ 20 мянган хүн оролцсон бол 1,2 сая орчим хүн үзэж сонирхжээ. Эл нүсэр арга хэмжээг Их Британийн 22 хотод аварга том дэлгэцээр шууд дамжуулан үзүүлсэн байна.
Темза мөрөнд болсон усан парад нь зургадугаар сарын 2-5-нд тэмдэглэх хатан хаан II Елизаветагийн угсаа залгамжилсны ойн баярын гол үйл явдал байлаа. Баяр ёслолын ажиллагаа ням гарагийн орой Букингемын ордны өмнө болсон рок концерт болон ёслолын буудлагаар дууссан байна.
Британийн хатан хаан II Елизавета 1952 онд хаан ширээнд заларчээ. Тэрбээр хаан ширээнд заларсан хугацаагаар Их Британийн түүхэнд 63 жилийг хааны сэнтийд өнгөрүүлж байсан хатан хаан Викториягийн дараа хоёрдугаарт ордог байна.
Түүнчлэн даваа гарагийн орой дэлхийн рок попын дод Букингемын ордны өмнө томоохон концерт тоглон хатан хаанд хаан ширээнд заларсны "алмаазан ойг" тохиолдуулан баяр хүргэнэ.
Концерт хатан хааны ордны өмнөх талбайд 19.30 цагт эхлэх бөгөөд Энни Леннокс, Робби Уильямс, Грейс Жонс, Том Жонс, Ширли Бэсси, Кайли Миноуг, Стив Уандер, Клифф Ричард, Элтон Жон болон Пол Маккартни зэрэг алдартнууд хатан хаанд зориулж ая дуугаа өргөнө.
Концертын тасалбарыг сугалаагаар үнэгүй тараажээ.
Д.Жаргал