Эдгээр Хятад оюутнууд үйлчлүүлэгчийнхээ үс, хумсыг засч, массаж хийхийг сурахын тулд хиймэл маникан дээр сургуулилт хийж байна. Гэхдээ тэд саун массаж юм уу сувилалд ажиллахгүй. Тэд нас барсан хүний цогцсыг оршуулгад бэлтгэхийг сурч байгаа нь энэ юм.
Хятадууд өөд болсон хүний хойчийн ажил явдалд оролцохыг нэг их таашаадаггүй. Гэхдээ Дундад улсад оршуулгын үйлчилгээ үзүүлдэг компаниудад ажиллах залуучуудын тоо нэмэгдэж байна.
Оюутан Жен Лианлиан ярихдаа "Бид бүгд залуу хүмүүс, бусдаас өөр үзэл бодолтой, миний хувьд энэ мэргэжлээр ажиллах нь тийм ч муу зүйл биш, өнгөрсөн үед нас барсан хүний хойчийн үйлийг гардан хийдэг хүмүүст хүндэтгэлтэй ханддаггүй байсан, гэхдээ бид энэ ажлыг хийж, нас барагсдыг илүү хүндэтгэлтэй байдлаар эцсийн замд нь үдэх болно гэдэгт итгэж байна" гэжээ.
Хятадад оршуулгын үйлчилгээ үзүүлдэг компаниудад ажиллах мэргэжилтэн бэлтгэдэг дөрвөн коллеж үйл ажиллагаагаа явуулж байна. Төгсөгчид нь сарын 750 долларын цалинтай ажиллах ч боломжтой. Энэ салбарт өрсөлдөгч багатай учраас сургуулиа төгсөөд ажиллахад ажлын байр нь бараг баталгаатай гэсэн үг юм. Гэхдээ нас барагсадтай холбоотой зүйлс цээртэй байдаг Хятад улсад энэ чиглэлээр ажиллахаар сонгосон хүмүүс багагүй эсэргүүцэлтэй тулгардаг байна.
Оюутнуудад хичээл зааж байгаа Лин Пэижи ярихдаа "Гэрлээгүй, хүүхэдгүй, өөр сонголтгүй хүмүүс л энэ мэргэжлээр ажиллах ёстой гэж настай хүмүүс хэлдэг, гэхдээ залуучууд энэ мэргэжлээр ажиллаж, айж эмээгээд байх зүйл байхгүй гэдгийг бусдад харуулна гэдэгт бид найдаж байна" гэжээ.
Ийнхүү нас барагсдын хойчийн үйлийг хийж, оршуулгын үйлчилгээ үзүүлэх нь Хятадад хамгийн ашигтай 10 бизнесийн нэгд тооцогддог аж. Энэ чиглэлээр үйл ажиллагаа явуулдаг Хятадын компаниуд жилд нийтдээ 31 тэрбум долларын орлого олдог байна.
Э.АМАР