Лондонгийн олимп, паралимпад оролцох Монголын баг тамирчдыг үдэх ёслолын арга хэмжээг өнөөдөр Сүхбаатарын талбайд зохион байгуулах гэж байна. Энэ талаар өчигдөр Биеийн тамир, спортын газрын дарга Ч.Наранбаатар, Монголын үндэсний олимпийн хорооны Олимп судлалын төвийн захирал Ж.Баасанхүү, БТСГ-ын Төрийн захиргаа, удирдлагын хэлтсийн дарга Д.Сүх-Очир нарын албаны хүмүүс мэдээлэл хийв.

Үдэлтийн арга хэмжээ спортын салбарын үе үеийн төлөөллүүд 10.30 цагт Сүхбаатарын хөшөөнд цэцэг өргөснөөр албан ёсоор эхлэх юм байна. Тамирчид Спортын төв ордонд цуглаж, тэндээс Сүхбаатарын талбай руу жагсч явах гэнэ. Лондонгийн олимп болон паралимпийн наадамд оролцох Монголын баг тамирчдад зориулж, Монгол Улсын Ерөнхийлөгч Ц.Элбэгдорж үг хэлэх бөгөөд “Лондон-2012” олимпийн наадамд оролцох Монгол Улсын баг, тамирчдын ахлагч, Шадар сайд М.Энхболдод Монгол Улсын төрийн далбааг хүлээлгэн өгөх юм. Харин Шадар сайд Монголын багийн тугчид төрийн далбааг шилжүүлнэ.
"Лондон-2012" зуны наадамд эх орон, ард түмэн, тамирчдаа төлөөлөх шигшээ багийн тугчаар Монгол Улсын Гавьяат тамирчин Б.Сэр-Од тодорчээ.

Олимпийн наадамд оролцох Монголын баг тамирчдын салхийг хагалж, хамгийн түрүүнд олимпийн эрхээ авсан тул түүнд ийн хүндэтгэл хүлээлгэсэн байна.
“Лондон-2012” зуны олимпийн наадамд оролцох Монголын баг, тамирчдыг үдэх ёслолын үеэр тамирчдаа төлөөлж, жүдо бөхийн төрөлд өрсөлдөх Монгол Улсын Хөдөлмөрийн баатар, Гавьяат тамирчин Х.Цагаанбаатар, Гавьяат тамирчин М.Бундмаа нар тангараг өргөх ажээ. Олимпийн нэгэн хүндэтгэлд зүй ёсоор багтах тамирчдын тангаргыг үнэнч, шударга өрсөлдөхөө олимпийн таван цагаригт цагаан тугийн өмнө батлан тангарагладаг уламжлалтай. Олимпийн дүрмийг хүндэтгэн сахиж, спортын алдар, өөрийн багийн нэр төрийн төлөө спортын чин шударга сэтгэлийн үүднээс олимпийн наадамд оролцохоо нийт тамирчдын өмнөөс ийн тангараглах юм.