АНУ-ын Төрийн нарийн бичгийн дарга хатагтай Хилари Клинтон Ардчилсан орнуудын хамтын нийгэмлэгийн Удирдах зөвлөлийн IV хуралдаанд оролцохоор маргааш Монгол Улсад албан ёсны айлчлал хийх гэж байна.
Хатагтай Хилари Клинтоны онгоц маргааш 13.00 цагт Улаанбаатар хотноо газардах юм. Тэрбээр Чингис хааны хөшөөнд хүндэтгэл үзүүлээд Монгол Улсын Ерөнхийлөгч Ц.Элбэгдорж, Монгол Улсын Ерөнхий сайд С.Батболд нарт бараалхах юм байна. Улмаар Төрийн ордны Ардын их хурлын танхимд болох Эмэгтэйчүүдийн манлайллын асуудлаарх олон улсын форумд үг хэлнэ. Түүний айлчлал энэ сарын 10-нд өдөрлөх юм.
Ардчилсан орнуудын хамтын нийгэмлэгийн Удирдах зөвлөлийн хуралд одоогийн байдлаар Удирдах зөвлөлийн 25 гишүүн орны 17-гоос нь албаны хүмүүс ирэхээ нотлоод байна. Удирдах зөвлөлийн хурлаар зохион байгуулалтын чанартай олон асуудал хэлэлцэнэ. Хамгийн чухал шийдвэр бол ирэх жил Улаанбаатар хотноо болох Сайд нарын бага хуралд бэлтгэх төлөвлөгөөг хэлэлцэн тохирох явдал юм байна. Удирдах зөвлөл АОХН-ийн анхны Ерөнхий нарийн бичгийн дарга Элчин сайд Мариа Лайснерыг албан ёсоор ажилд нь оруулж, түүний цаашдын зорилт, төлөвлөгөөг сонсох аж.
Н.Гантуяа 
МОНЦАМЭ