Америкийн Колорадо мужийн Денвер хотын ойролцоох кино театрт Бетмэн киноны шинэ анги болох "The Dark Knight Rises" гарч байх үеэр нэгэн буутай этгээд гал нээж, 12 хүний аминд хүрчээ. Мөн энэ халдлагын үеэр 50 гаруй хүн шархадсан байна.
Гэрчүүдийн хэлснээр баг зүүсэн эр нулимс асгаруулагч хийн савыг чулуудсаныхаа дараа гал нээж эхэлжээ. 24 настай эрийг ойролцоох авто зогсоол дээрээс баривчилсан байна. Тэрээр винтов, гар буу болон хутгатай явж байсан гэнэ. Холбооны Мөрдөх Товчооныхон халдлага үйлдсэн этгээдийн нэрийг Жэймс Холмз гэж мэдээлжээ. Цагдаа нар түүнийг нарийн судлах зорилгоор найз нөхөд, ойр дотныхноос нь байцаалт авч байгаа юм байна.
Сэжигтэн цагдаа нарт гэрт нь тэсрэх бодис бий гэж мэдүүлсэн байна. Орон нутгийн телевизээр мэдээлснээр шархадсан хүмүүсийг эмнэлэгт эмчилж байгаа аж. Тэдний дунд суманд өртсөн гурван сартай хүүхэд ч байгаа гэнэ.
Америкийн ерөнхийлөгч Барак Обама халдлагыг цочирдон хүлээн авснаа хэлээд буруутай этгээдийг шүүх болно гэж мэдэгджээ.
Э.АМАР