УИХ-ын гишүүд Төрийн ордонд зодолдож, энэ нь олон нийтийн “хүртээл” болсон нь өнгөрсөн долоо хоногийн дуулиан байлаа. 

УИХ-ын гишүүн У.Хүрэл­сүх чуулганы тан­химаас Г.Баярсайхан ги­шүүний араас дагаж гарс­наа, шанаадаж унагаж байгаа нь хэвлэл мэдээллийн хэрэгслүүдээр гарсан. Тэгвэл үнэн­дээ “Би чамд хайртай” кинонд гардагчлан “Баяраа өөрөө л уначихсан юм билээ” гэдэг болсон бололтой. 

Намын бүлгийн асуудлаас болж АН, МАН-ын гишүүд нэлээд маргалдсан. Тухайл­бал С.Эрдэнэ гишүүн, У.Хүрэл­сүх гишүүнтэй мар­гаж, дундуур нь Г.Баяр­сайхан гишүүн үг хавчуулаад авсан. 

Дараахан нь У.Хүрэлсүх, Г.Баяр­­­сайхан­тай “тус­гай­лан” уулзсан бөгөөд өөрс­дөө тайл­бар­лах­даа “Чуул­ганы танхимаас гарч, эр хүмүүс шиг учраа олол­цох гэсэн” хэмээдэг. 

Мэдээж, энэ явдал тэгсхийгээд намжихгүй нь тодорхой боллоо. Зарим хүн эрчүүдийн зодоон гэхээсээ илүү улстөржүүлэн тайлбарлаж байгаа. Түүгээр ч зогсохгүй Г.Баярсайхан гишүүн У.Хүрэлсүх гишүүнд цохиулсандаа гомдолтой хэмээн хуулийн байгууллагад хандсан гэнэ. 

Ингэж хандахдаа мань хүн чухам өөрөө эхэлснээ, бас чуулганы танхимд салаавч гаргасан тухайгаа мэдүүлсэн эсэх нь тун сонирхолтой. 

Өөрөөр хэлбэл, У.Хүрэл­сүх гишүүний өөдөөс анх Г.Баярсайхан гишүүн салаавч гаргажээ. Уг нь бол өөрөө унасан хүү­хэд уйлдаггүй гэдэг үг бий. Хүний тэвчээрийг алдартал өдчихөөд, эцэст нь гон­шигонож гүйх нь эр хүний­хээ хувьд хэр ёс зүйтэй болохоо илэрхийлж байгаа хэрэг бус уу. 

Түмнийхээ төлөө зүтгэнэ хэмээн төрийн түшээ болсон хэрнээ Г.Баярсайхан гишүүн парламентын чуулганы танхимд салаавч гаргаад сууж байгаа нь тэгээд “ариун явдал” юм байх даа. 

Олон нийтийн өмнө бус-дад зодуулчихсан өрөвдмөөр хүн болж харагдаж байгаа ч яг үнэндээ өөрийнхөө хүссэнд хүрсэн юм биш үү. Г.Баярсайхан гишүүн У.Хүрэлсүх гишүүнээр цо­хиулахыг хүссэндээ л чуулганы танхимд “сэмхэн” салаавч гаргасан хэрэг.

Түүнийг төрийн их сүлдэт чуулганы танхимд салаавч гаргаж буйг олон нийт мэдэхгүй гэж бодсон бололтой. Ард түмнийг чуулганы танхимд юу болж буйг мэдэхгүй сохор гэж тооцолсон нь илэрхий. Тиймээс л танхимын гадна гарч ирээд У.Хүрэлсүхийг заамдаж аваад, боох гэж байж хариу үйлдэлд нь унасан хэрэг. 

Ядахад У.Хүрэлсүх гишүүн шиг чуулганы тан­химаас гаргаж байгаад “ухамсрын шанаа” өгөх хэрэг­тэй шүү дээ. Тэгсэн бол шударга харагдана. Тэрбээр “дотор” санаа агуулж, олон нийтийн өмнө өрөвдмөөр царай гаргасан нь эр хүнийхээ хувьд жудаггүй, УИХ-ын гишүүний хувьд ёс зүйгүй гэдгээ харууллаа. 

Тэгээд ч У.Хүрэлсүх “Манай намыг шүүмжилж болно. Харин доромжилж болохгүй” гэсэн. Үнэхээр ч улстөрийн хүрээнд муулж, магтах нь энгийн үзэгдэл. Доромжлол болчихвол зохисгүй үйлдлийн эхлэл болдог. Тэр ч утгаараа 90 жилийн түүхтэй МАН-ыг доромжлох нь олон хүнд таатай санагдаагүй биз. Тиймээс л МАН-ын экс генсекийн тэвчээрийн хязгаар дээд цэгтээ тулж, салаавчны хариуд шанаа өгснийг олон нийт дэмжиж байгаа бололтой.