Монгол Улсад Барилгын салбар үүсч хөгжсөний 86 жилийн ойн баярыг тохиолдуулан "Дэлхийн хөгжлийг Монголд" уриан дор “Барилга Экспо-2012” олон улсын үзэсгэлэн яармаг ирэх амралтын өдрүүдэд зохиогдоход бэлэн болжээ.
Тус үзэсгэлэн, яармагаар гадаад, дотоодын барилгын компаниудын үйл ажиллагаа, бүтээн байгуулалт, орон сууц, барилгын материал гээд салбартай холбоотой бүхий л мэдээллийг хэрэглэгчдэд хүргэхээс гадна дэлхийн шилдэг техник технологийг танилцуулах юм. Энэ үеэр Щвейцарь улс нарны гэрлээр барилга байгууламжийнхаа эрчим хүчийг хэрхэн шийдсэн, ОХУ-ын дээвэр, дулаалгын материал, цахилгааны хэрэгсэлүүдээс гадна DoorHan брэндийн гарааш, үйлдвэрийн, галын хамгаалалттай гээд бүх төрлийн модон болон хөнгөн цагаан хаалгануудаас сонголтоо хийх боломжтой аж.
Мөн Польш, Турк, Германы дэлхийд алдартай сантехникийн чанартай материалууд, Италийн барилгын аюулгүй ажиллагааны хувцас, тоног төхөөрөмжөөс гадна алдарт брэнд “CAT”-ийн тоног төхөөрөмжтэй танилцахаас гадна Хятад, Солонгос, Япон, Чех, Тайвань зэрэг орны барилгын компаниудын шилдэг брэнд бүтээгдэхүүн дэлгэгдэж, үйл ажиллагаа амжилтын нууцаасаа дэлгэх юм.
Үзэсгэлэн яармагийг сорин ирсэн үзэгчдэд зориулсан амины орон сууцны талаарх зөвлөгөө зөвлөмжийг өгөх бол барилгын салбарт үйл ажиллагаа явуулж байгаа аж ахуйн нэгжид зориулагдсан олон төрлийн бизнес уулзалт, сургалтууд зохион байгуулагдах юм байна.
"Барилга Экспо-2012" олон улсын үзэсгэлэн яармаг есдүгээр сарын 6-9-ний өдрүүдэд Улаанбаатар хотноо "Мишээл Экспо" төвд болно.
Н.Туяа