Сумогийн Их аварга Д.Даг­ва­дорж МҮОНРТ-ийн захирал М.Наран­баатарыг зодсонд эрүү­гийн хэрэг үүсгэсэн тухай бид өмнө нь мэдээлж байсан билээ. Түүнийг хэсэг хугацаанд баривч­лан саатуулсан бөгөөд ах Д.Сумъяа­базар нь батлан даалтад авсан.
Гэтэл өчигдөр Д.Сумъяабазар өөртэйгөө холбоотой хэргийн талаар мэдээлэл хийхдээ дүү Д.Даг­вадорж нь М.Наранбаатарыг зодсон нь эрчүүдийн хооронд байдаг л асуудал гэх утгатай зүйл ярьсан юм. Мэдээж нэг айлын хүүхдүүд биесээ өмгөөлж, хамгаалах нь зүйн хэрэг. Тэр ч байтугай хуулинд гэр бүлийнхнийхээ эсрэг мэдүүлэг өгөхгүй байх эрхтэй гээд заагаад өгчих­сөн байдаг.
Гэхдээ хүний хамрыг мурийтал, нүдийг хөхөртөл цохих нь эр­чүүдийн дунд байдаг л асуудал юм бол чухам ямар зодооныг хуулийн хүрээнд шийддэг байх вэ. Эсвэл энгийн иргэд болоод улстөрчдийн зо­дооныг хуулийн дагуу шийддэг, бөхчүүдийн оролцоотойг нүдээ аньж, чихээ бөглөн хэрэгсэхгүй хэмээн өнгөрөөх журамтай юм болов уу гэсэн сэтгэгдэл төрж бай­на. 
Тиймгүйсэн бол У.Хүрэлсүх гишүүн Төрийн ордонд Г.Баяр­сайхан гишүүнийг  шанаадсан нь мөн л эрчүүдийн хоорондын асуудал юм биш үү. Харин ч чуулганы танхимд, гишүүдийн маргаан дундуур хэрүүлч зан гаргасан Г.Баярсайханд ухамсрын шанаа өгч “томчуудын ярианд багачууд оролц­доггүйг” ойлгуулсан үйлдэл бол­лоо гээд хэлчихвэл яадаг юм бол.
Ямар Г.Баярсайхан гишүүний нүд хөхөрч, хамар мурийсан биш. Гоо сайханд нь л лав халдаагүй юм билээ. Харин ч М.Наранбаатарын хувьд олон нийттэй харилцдаг хүн хөх нүд, мурий хамартай байх нь тийм ч таатай харагдахгүй л байгаа байлгүй. Ингээд харьцуулахад эрчүүдийн зодоонд чухам хэн оролцож байгаа нь хамгийн чухал асуудал гэдэг нь бололтой.