Их, дээд сургуулийн төлбөр инфляцийн шалтгаан болжээ гэх мэдээлэл гар­лаа. Үүнээс харахад Мон­голд инфляцийг өөд та­тагч хүчин зүйл дэндүү олон болсон бөгөөд олонх нь засаг захиргаагүй ху­дал­­даачдын санаагаараа зо­­хиосон үнэ ханшаас үүдэл­тэй. Монголбанкны хам­гийн сүүлд гаргасан тай­лангаас үзэхэд инфляци гэгчид дарлуулсан бараа, бүтээгдэхүүнүүдээс хүнс, хоол нэгдүгээрт жагсчээ.
Өөрөөр хэлбэл, ганцхан сарын дотор хүнсний ба­рааны үнийн индекс 94.3 хувиар нэмэгдсэн байна. Энэ нь 8-9 дүгээр сарын дотор бий болсон сөрөг үзүүлэлт юм. Буруутан нь хичээлийн шинэ жил бололтой.
Хүүхдээ сургуульд нь явуулах гэсэн эцэг, эхчүүд халаасаа гүвэн, эцсийн сохор зоосоо  шавхаж, болохгүй бол өр тавин мөнгө олдог. Энэ нь сургалтын төлбөр, байрны хөлсөнд зарцуулагдахаас гадна бэлэн хувцасны дэл­гүүр, баар, паабуудын ашиг болдог гэхэд болно. Түүнээс гадна малчид хэдэн үхэр, хонио зарж, оюутны мөнгө бэлдэж эхлэхэд ченжүүд үүн дээр чадмаг тоглож, махны үнийг өсгөдөг нь нууц биш. Яг үнэндээ малчдаас хонь хэд вэ гэж асуухад “Сайн шүдлэн 65 мянга” гэж байсан. Харин ченжүүд 65 мянгыг 150 мянга болгодог шидтэй.
Өчигдрийн байдлаар нийслэлд кг үхрийн мах 7500-8600 төгрөгийн хоо­ронд хэлбэлзэж  байсан  бол хонины мах 6800-7200, ямаа­ных 5300-5800, адууных 6000 төгрөг болсон байв. Хаврын хэт хөөрөгдлийг бодвол овоо дөнгүүр ханш мэт боловч 14 хоногийн дотор 500-1000 төгрөгөөр өссөн үзүүлэлт юм.
Одоо махны үнэ буурах нь эргэлзээтэй. Хүйтний эрч чангарах тусам хэдэн төгрөгөөр өссөөр цагаан сараар нийслэлчүүд кг махыг 15 мянган төгрөгөөр авч байвал гайхах хүн гарахгүй л болов уу.
Гурил, будааны үнэ ч ялгаагүй. Зарим бараа, бүтээгдэхүүний гаалийн онцгой татварыг өсгөсөн сургаар хүнсний зах, дэл­гүүрүүд гурилын үнийг 100 орчим төгрөгөөр нэмсэн байх юм. Үүнээс болж талхны үнэ өснө. Монголчууд талх­ны үнэтэй  бүхий л  амьд­ралаараа холбоотой болохоор сүйхээтэй нэгэн нь үүгээр далимдуулж ашиг олох гэж оролдох нь тодорхой.
Саяхан л гэхэд “Атар-Өргөө” компани “амьсгалдаг” уутанд талх хийж байгаа учраас гэх тайлбартайгаар  дугуй талхны үнийг өсгөх гэж оролдсон. Гор нь одоо ч арилаагүй энэ дуу­лианы уршгаар талх, на­рийн боов үйлдвэрлэдэг жи­жиг аж ахуйн нэгжүүд бү­тээгдэхүүнийнхээ үнийг нэмсэн.
Тэр ч бүү хэл энэ хэл ам нийслэлээс хальж, өд­гөө эрдэнэтчүүд ганц талхыг /ууталж, савлаагүй, дөр­вөл­жин талх/ 860 төг­рөгөөр авч байгаа аж. Шалт­гааныг асуувал хо­тынхон ханшаа өсгөөд байхад бид яагаад болдоггүй юм гэж байна билээ.
Эндээс харахад мон­голчуудыг ганц бензиний биш талх, махны үнэ хүртэл дээрэлхэн, дарлах болжээ.