Улаанбаатар хот цаашид дэлхийн том хотуудын жишгээр цэвэр, бохир усны шугам сүлжээгээ ухаж биш дотроос нь шинэчилдэг технологийг нэвтрүүлэх талаар судалж байна. Дэлхийн бүх том хотуудад хэрэглэж буй, Австри улсаас гаралтай энэхүү технологийг Улаанбаатарт нутагшуулах талаар Нийслэлийн Засаг дарга бөгөөд Улаанбаатар хотын Захирагч Г.Мөнхбаяр өнөөдөр Австрийн Эдийн засгийн танхимын дэд Ерөнхийлөгч хатагтай Улрик Рабмэр-Келлэрийг хүлээн авч уулзах үеэрээ ярилцлаа.

Хуучирч муудсан шугам сүлжээг солих болоход баахан хөрс шороо ухаж, зам талбайг ухаж сэндийлэх хэрэг гардаг. Харин энэхүү технологи нь зэвэрч муудсан шугам хоолойг дотроос нь цэвэрлэж, бас дотроос нь бэхэлдэг байна.

Манайд одоо хэрэглэж буй аргаар шугам сүлжээг ухаж солиход 20-н 7 хоног зарцуулдаг бол шинэ технологиор 3-4-н 7 хоног шаардлагатай байх аж. Цаг хугацаа, хөрөнгө мөнгө ихээхэн хэмнэж, шинээр хийж бүтээсэн дэд бүтцээ эвдэж, сүйтгэхгүйгээр шугам сүлжээгээ шинэчлэх боломжтой энэхүү шинэ технологийг нутагшуулах, хамтран хэрэгжүүлэх талаар шаардлагатай ажлуудыг нэн даруй хийж хэрэгжүүлэхийг хотын дарга холбогдох албатууддаа үүрэг болгосон юм.