Зуны нарлаг өдрүүдээ ард үлдээж, намрын налгар өдрүүдтэй золгож байгаа энэ өдрүүдэд TV ZONE сэтгүүлийн 170 дахь дугаар уншигч таны ширээнээ хүрч байна.
Энэ удаагийн дугаарт гоо сайхан, ур ухааныг хослуулж, дэлхийн мисс-д Монгол орноо төлөөлөн чамлахааргүй амжилттай оролцож байсан Мисс Эрдэнэ-Очирын Сэлэнгэтэй алс холын Америк улсаас холбогдон чин сэтгэлийн яриа өрнүүллээ. Америкийн Нэгдсэн Улсад сурч, боловсорч байгаа бүсгүйн хүсэл мөрөөдлийнх нь талаар ярилцсан сонирхолтой ярилцлагыг дугаарын зочин булангаас уншаарай.
Уншигч танд зориулсан амттай булан Шар хуудаснаа сайн цагийн мянган бөөгийн давалгаа олны танилуудаас хэнийг хамарч байгааг, “Нисванис”-ын Амгаа өрхийн тэргүүн болж, голомтоо бадраасан тухай, Монгол жүжигчин урд хөршийн кино ертөнцөд нэрээ гаргаж буй талаар, мөн дуучин Нара англи хэлнийхээ мэдлэгийг гайхуулж, багшлах болсон тухай сонирхолтой мэдээллүүдийг багтаалаа.

Сэтгүүлчийн хараанд тусч, бодол эргэцүүлсэн нийгмийн асуудлыг хөнддөг “Энэ сэдвээр…” булан энэ удаад хөл залгуулж, цаг хугацаа хэмнэх такси, тэр дундаа амины унаагаа такси болгон ашиглагч хүмүүсийн тухай онцолжээ. Уншигч та ч асуудлын гарцад хамтдаа нэгдэж, өөрийн бодлоо тунгаагаарай.
“Загасан нүд” олон улсын сонирхогчдын теле наадам Улаанбаатар хотноо энэ өдрүүдэд зохион байгуулагдаж байна. Олон сонирхолтой үйл явдлаар дүүрэн энэ жилийн наадмын талаар ээлжит мэдээ мэдээлэл таныг хүлээж байна.
Таны амьдралын хамгийн чухал нь хайр уу, мөнгө үү? Мөн та өөрийнхөө хайртай хүнийг дуртай өнгөөр нь сонжих, зуны бүгчим цагт таны даралт ихэсч байгаа бол энэ асуудлаас хэрхэн сэргийлэх зөвлөгөө, гоо сайхан, эрүүл мэнд, хүүхэд, авто, спорт, кино хөгжим гээд уламжлалт булангууд цоо шинэ, сонирхол татам мэдээ мэдээллээр баяжин танд хүрч байна.
Дэлхий дахинаа өөрийн зодооны урлагаа гайхуулж, домог мэт амьдарсан Брюс Ли энэ удаагийн карьер булангийн зочин болжээ.
TV ZONE сэтгүүлийн хамт олон ирээдүйн “Ардын жүжигчин” бяцхан хүүг энэ удаа ярилцагынхаа зочны хойморт урьсан юм. Кино код тэмцээнд амжилттай оролцон насандаа ахадсан мөрөөдөл, зорилгыг өмнөө тавьсан хүүгийн ирээдүйн зорилгынх нь талаар сонирхолтой ярилцлагад уншигч таныг урьж байна.
Түүнчлэн та шинэ долоо хоногт Монголын болон Оросын онцлох сувгууд танд зориулж ямар ямар хөтөлбөр бэлтгэснийг цаг агаарын урьдчилсан мэдээ, өрнө дорнын зурхайн зурлага, энэ өдөр, онч үгийн хамт тольдон хараарай.

Гэр бүлийн гишүүн бүрт зориулагдсан TV ZONE таныг хүндэтгэн золгож байна.