Зун цаг налгар намарт халаагаа өгсөн их ажлын өдрүүд эхэлж буй энэ үед TV ZONE сэтгүүлийн шинэхэн дугаар уншигч таны гар дээр очиж байна. Будаг нь ханхалсан шинэхэн дугаарын маань нүүрийг залуу жүжигчин О.Дөлгөөн хэмээх гал цогтой бүсгүй чимлээ. Жүжигчин О.Дөлгөөнийг “Амьдралд тавтай морил” олон ангит киноны Золоо хэмээх зурагчин бүсгүйн дүрээр уншигчид маань андахгүй танил болсон биз. Хэвлүүхэн яриатай, энгийн эрхэмсэг энэ бүсгүйн дотоод ертөнцөөр аялахыг урьж байна.
Сэтгүүлийн уншиж дадсан дараагийн хуудсуудад улс төр, урлагийн соёлынхны халуун тогоон дахь хор шаргүйхэн жиг жуг мэдээллүүд багтлаа. Амттайхан энэ хуудаснаас Монголдоо олонд танигдсан дуучид кино бизнес рүү хуйлрах болсон шалтгааны хөшүүрэг нь юу байгаа талаар уншаарай.
Дуулах жүжиглэх, удирдах ажил албатайгаа хослуулан эрүүл мэндийн салбарт хүч үзэж буй дуучин Баясгалангийн дараагийн чадвар дээр нэмээд хөрөнгө цохих “авьяас” юу байх бол?
Хүнийг байтугай араатан амьтныг ч уяраах увидастай уртын дуутай амьдралаа холбосон уран бүтээлч бол яахын аргагүй Монгол улсын Гавьяат жүжигчин Г.Хонгорзул билээ. Уран бүтээлч бүрт заяагаад байдаггүй ховор аз завшааныг эдэлсэн энэ бүсгүйг дайчин даруухан хэмээн тодотгосон учрыг шар мэдээнээс сонирхоорой. Олны танил хүмүүсийн өнцгүүдийг өөчилдөг энэ булангаар Хууль Зүй Дотоод Хэргийн сайд Ц.Нямдоржийн өнцгүүдийг тодотгож байна.

  Өөрийн буруугаас бус угсаа гарлаасаа болж 15-хан насандаа хорвоог орхисон Анна Франкийн өдрийн тэмдэглэлийг дэлхий дахинаа заавал унших номын жагсаалтын тоонд оруулсан байдаг. Дэгэж дэрвэх өсвөр насаа хоргодох байранд өнгөрөөсөн Анна Франк хэмээх еврей охины өрөвдөм гунигт тавиланг Карьер булангаас болгооно уу.
    Хэзээд, хэдийд ч нүдээ үл цавчих амьтан бол загас. Тэгвэл дэлгэцийн урлагийн амин сүнс болсон камерыг нүдээ үл цавчих загастай зүйрлэхгүй байхын аргагүй юм. Харин энэ урлагийг үзэгч олонд хүргэдэг телевизийнхний хойч үеийг бэлтгэх, мөн сонирхогчдын хүрээг тэлж, тэдний чадварыг мэргэжлийн хэмжээнд хүргэх зорилго бүхий “Загасан нүд” наадмын грапри, бусад номинацийн эздээр ямар улс тодорсныг сонирхох боломжийг TV ZONE сэтгүүл олгож байна.
Сэтгэл зовиноож, бухимдал төрүүлсэн асуудлыг үгээрээ бас үзгээрээ хөндөн илэрхийлдэг Энэ сэдвээр... буланд “Эвлүүлдэг тоглоом“ гарчиг дор сууриа хэзээ тавьсан нь тодорхой бус ч эвлүүлдэг тоглоом өрөх мэт нүд ирмэх зуур сүндэрлэх барилга байгууламжийн чанар ямар түвшинд байдаг талаар сонирхлоо.
Цалингаас цалин уу, цалин – зээл – цалин уу хэмээх сонголт таны мөнгөө зөв, буруу зарцуулсантай шууд холбоотой. Уншигч та гарлагын үүдээ хааж, орлогынхоо үүдийг нээхийг хүсвэл зөвлөгөө буланд зочлоорой. Орон гэрээ тохилог тухтай орчноор бүрдүүлэхийг хүсдэггүй хүн үгүй. Тэгвэл интерьер булангаас та унтлагын өрөөний дизайны сонгодог шийдлийг харах боломжтой юм. 
Тайлагдаагүй нууцын тайлал, танин мэдэхүйн сонирхолтой мэдээллүүд болон бяцхан уншигч нартаа зориулсан үлгэр, буддаг зургуудаас эхлээд сонжоонд дуртай сонжоочдын зугаа, үгийн сүлжээ, судоку, шидэт зураг гээд Зав гарлаа булан иж бүрнээрээ таныг хүлээж байна.
      Долоо хоног тутмын сэтгүүлийн чухал мэдээллүүдээс гадна Монголын бүхий л телевизүүдийн хөтөлбөрүүд танд юу зориулж, бэлдсэнийг сонирхоорой. Мөн Оросын хамгийн сонирхолтой сувгууд ч бидэнд хөтөлбөрөө ирүүлснийг танд дуулгахад таатай байна.
      TV ZONE сэтгүүлээ гэр бүлийнхээ гишүүн болгосон уншигч танд баярлалаа.